երկուշաբթի, 26 նոյեմբերի 2007
ՀՀ վարչապետ Սերժ Սարգսյանն այսօր ընդունել է Արհմիությունների համընդհանուր համադաշնության գլխավոր քարտուղար Վլադիմիր Շչերբակովին և Հայաստանի արհմիությունների կոնֆեդերացիայի (ՀԱՄԿ) նախագահ Մարտին Հարությունյանին: Վլ. Շչերբակովը գոհունակությամբ է խոսել ՀԱՄԿ-ի և նրա երկարամյա նախագահի հետ համագործակցության մասին` վստահություն հայտնելով, որ տարիների ավանդույթ ունեցող այդ արդյունավետ գործակցությունն այսուհետ ևս կշարունակվի: Արհմիությունների համընդհանուր համադաշնության գլխավոր քարտուղարը ՀՀ կառավարության ղեկավարի հետ հանդիպման ժամանակ նշել է, որ տպավորված է Հայաստանի տնտեսական հաջողություններով և ՀՀ քաղաքացիների կենսապայմանների բարելավման ուղղությամբ իրականացված ու շարունակվող աշխատանքով: Վլադիմիր Շչերբակովը խոսել է աշխարհի տարբեր երկրների արհմիությունների և հեղինակավոր կազմակերպությունների հետ Արհմիությունների համընդհանուր համադաշնության ակտիվացող փոխգործակցության մասին ևս:
Վարչապետ Սերժ Սարգսյանը, հյուրի խնդրանքով, ներկայացրել է Հայաստանի տնտեսական վիճակը, 2008թ. ՀՀ պետական բյուջեի նախագծով նախատեսվող սոցիալ-տնտեսական ծրագրերն ու կառավարության գերակայությունները:
Սերժ Սարգսյանը Հայաստանի արհմիությունների կոնֆեդերացիայի երկրորդ համագումարին մաղթել է հաջողություններ և արդյունավետ աշխատանք, հույս հայտնելով, որ կոնֆեդերացիայի վաստակաշատ նախագահի փոփոխությունը որևէ ձևով չի անդրադառնա կազմակերպության հետագա գործունեության վրա, և ՀԱՄԿ-ը ժամանակի պահանջներին համահունչ կշարունակի լավագույնս կատարել իր առաքելությունը:
