չորեքշաբթի, 13 մարտի 2002
«Մեր երկրների միջև կան համագործակցության չօգտագործված բավականին հնարավորություններ առևտրատնտեսական, գիտատեխնիկական, մշակութային և մի շարք այլ բնագավառներում: Անհրաժեշտ է արագացնել Հայաստանի և Ինդոնեզիայի միջև «Եկամուտների և գույքի կրկնակի հարկումը բացառելու մասին» արդեն ստորագրման պատրաստ համաձայնագրի ընդունումը, ստեղծել գործակցության իրավապայմանագրային դաշտ և համատեղ ծրագրերը տեղափոխել գործնական հարթություն», - նշել է ՀՀ վարչապետ Անդրանիկ Մարգարյանը Հայաստանում արտակարգ և լիազոր դեսպան Ռեմի Ռոմաուլի Սիահանի հետ հանդիպման ժամանակ, որը երեկ իր հավատարմագրերն է հանձնել ՀՀ նախագահին: Այդ առիթով վաչապետը շնորհավորել է դեսպան Ռեմի Ռոմաուլի Սիահանին և հույս հայտնել, որ նրա նշանակումով հայ-ինդոնեզական դեռևս ոչ բավարար գործակցության մեջ տեղաշարժ կարձանագրվի: Անդրանիկ Մարգարյանը կարևորել է ագրոարդյունաբերության, բարձր տեխնոլոգիաների, զբոսաշրջության ոլորտներում ինդոնեզական փորձի փոխանակումը, երկու երկրների միջև ուղիղ առևտրային կապերի հաստատումը, գործարարների միջև շփումների ակտիվացումը, միջազգային կազմակերպությունների շրջանակներում միմյանց հետ սերտ գործակցության շարունակումը:
Հայաստանի Հանրապետությունում Ինդոնեզիայի դեսպան պրն Ռոմաուլի Սիահանը վստահեցրել է ՀՀ վարչապետին, որ կանի ամեն հնարավորը համագործակցությունը զարգացնելու, երկու երկրների միջև փոխհարաբերությունները սերտացնելու ուղղությամբ և շնորհակալություն հայտնել Հայաստանի կառավարությանն ու նրա ղեկավարին այս հարցում իրեն աջակցելու պատրաստակամության համար:
