ուրբաթ, 1 մարտի 2002
Այսօր տեղի ունեցավ ՀՀ կառավարության արտահերթ նիստ, որը վարեց վարչապետ Անդրանիկ Մարգարյանը:
Օրակարգում՝ ՀՀ պետական կառավարման համակարգի բարեփոխումների իրականացման, «Պետական կառավարչական հիմնարկների մասին», ինչպես նաև «Քաղաքացիական ծառայության մասին» ՀՀ օրենքների կատարումն ապահովելու նպատակով գործադիր իշխանության մի շարք պետական մարմինների վերակազմակերպման մասին որոշումների քննարկումն էր և «Վարժական հավաքների ու զինծառայության ընթացքում անհայտ կորած և 2000 թվականի հոկտեմբերի 10-ի դրությամբ մահացած ճանաչված զինծառայողների գերեզմանների բարեկարգման, տապանաքարերի պատրաստման և տեղադրման հետ կապված ծախսերի փոխհատուցման մասին» որոշման նախագիծը:
Նիստի սկզբում նշվեց, որ մինչ այս վերակազմակերպումների վերաբերյալ հարցերը բազմակողմանի քննարկվել են նախարարություններում և գերատեսչություններում: Պետական կառավարման համակարգում բարեփոխումներն սկսված են և շարունակվելու են: Վերոհիշյալ օրենքներից բխող այս քայլերը միտված են կառավարման համակարգն առավել գործուն, արդյունավետ և ճկուն դարձնելուն, գործադիր իշխանության մարմինների համակարգը, խնդիրները, կառուցվածքները «Քաղաքացիական ծառայության մասին» և «Պետական կառավարչական մարմինների մասին» օրենքների դրույթներին ներդաշնակելուն՝ արդյունքում ակնկալելով նաև մարդկային և ֆինանսական ռեսուրսների տնտեսում, ուռճացված պետական ապարատի գործունեության համապատասխանեցում կառավարման արդի պահանջներին:
Այսօրվա որոշումներով, կառավարությանն առընթեր մի շարք պետական մարմիններ միացման ձևով վերակազմակերպվեցին տեսչությունների և գործակալությունների՝ համապատասխան նախարարությունների կազմում գործող առանձնացված ստորաբաժանումների կարգավիճակով:
Կառավարության այսօրվա նիստում նաև հավանություն տրվեց «ՀՀ պետական արարողակարգի ծառայության կարգավիճակի մասին» ՀՀ նախագահի հրամանագրի նախագծին, որով կառավարությանը հանձնարարվում է երկամսյա ժամկետում ընդունել որոշում՝ ՀՀ պետական արարողակարգի ծառայությանը արտաքին գործերի նախարարության համակարգում գործող «Պետական արարողակարգի ծառայություն» գործակալության վերակազմակերպելու վերաբերյալ, ինչպես նաև ընդունել հրամանագրից բխող այլ որոշումներ:
Գործադրի որոշմամբ, լուծարվեց ՀՀ կառավարությանն առընթեր կրոնի գործերի պետական խորհուրդը: Վերջինիս գործառույթները վերապահվեցին ՀՀ կառավարության աշխատակազմին:
Կառավարությունն ընդունեց նաև «Վարժական հավաքների և զինծառայության ընթացքում անհայտ կորած և 2000 թվականի հոկտեմբերի 10-ի դրությամբ մահացած ճանաչված զինծառայողների գերեզմանների բարեկարգման, տապանաքարերի պատրաստման և տեղադրման հետ կապված ծախսերի փոխհատուցման մասին» որոշումը, որով կարգավորվեց 2000 թվականի հոկտեմբերի 10-ի դրույթյամբ անհայտ կորած և օրենքով սահմանված կարգով մահացած ճանաչված թվով 93 զինծառայողների գերեզմանների բարեկարգման, տապանաքարերի պատրաստման և տեղադրման հետ կապված ծախսերի փոխհատուցման հարցը: ՀՀ կառավարությունը որոշեց այդ նպատակով ՀՀ 2002թ.-ի պետական բյուջեով նախատեսված պահուստային ֆոնդի հաշվին հատկացնել 33.5 մլն դրամ: Այս որոշմամբ համահարթեցվեց ՀՀ կառավարության 1997թ.-ի օգոստոսի 18-ի և 2000 թ.-ի հոկտեմբերի 14-ի որոշումներով անհայտ կորած զինծառայողների կապակցությամբ սահմանված փոխհատուցման տարբերությունը:
