ուրբաթ, 26 հոկտեմբերի 2007
Այսօր ավարտվում է ՀՀ վարչապետ Սերժ Սարգսյանի պաշտոնական այցը Ֆրանսիայի Հանրապետությունում: ՀՀ կառավարության ղեկավարի պաշտոնական հանդիպումներն ավարտվել են Ֆրանսիայի նախագահ Նիկոլա Սարկոզիի հետ հանդիպումով: ՀՀ վարչապետը և Ֆրանսիայի նախագահը քննարկել են երկկողմ քաղաքական, տնտեսական և մշակութային հարաբերություններին վերաբերող հարցերի լայն շրջանակ: ՀՀ վարչապետը վերահաստատել է Հայաստան Ֆրանսիայի նախագահի այցի` հայկական կողմի հրավերը, որը նախագահ Սարկոզին ընդունել է շնորհակալությամբ և պատրաստակամորեն: Երկկողմ համագործակցությունն առավել ընդլայնելու նպատակով, զրուցակիցները խոսել են նաև Փարիզում Հայաստանի մշակույթի տուն և Երևանում Ֆրանսիայի մշակույթի տուն հիմնելու կարևորության մասին: Նիկոլա Սարկոզին այս կապակցությամբ նշել է, թե որևէ խնդիր չի տեսնում անմիջապես այդ հարցը լուծելու համար:
Սերժ Սարգսյանը և Նիկոլա Սարկոզին երկկողմ ցանկություն են հայտնել ակտիվացնելու նաև ռազմական ոլորտում հայ-ֆրանսիական փոխգործակցությունը: Խոսվել է Հայաստանում ատոմային էներգետիկայի զարգացման ծրագրերում ֆրանսիական ընկերությունների ներգրավման հնարավորության մասին ևս: Երկուստեք ընդգծվել է երկու երկրների միջև տնտեսական հարաբերությունները քաղաքական հարաբերությունների մակարդակին հասցնելու կարևորությունը: Մշակութային և կրթական ոլորտներում կապերի սերտացման համատեքստում անդրադարձ է եղել, մասնավորապես, Հայաստանում Ֆրանսիական համալսարանի գործունեությունն ավելի բարձր մակարդակի վրա դնելու մասին: Այդ հարցում ևս Ֆրանսիայի նախագահը հավաստել է իր անվերապահ աջակցության պատրաստակամությունը: Նախագահ Սարկոզին, առհասարակ, գոհունակությամբ է խոսել այդ համալսարանի առկայության և գործունեության մասին:
ՀՀ կառավարության ղեկավարն ու Ֆրանսիայի նախագահը անդրադարձել են նաև երկու երկրների միջև վիզային ռեժիմի թեթևացման հնարավոր տարբերակներին:
Հանդիպման ընթացքում խոսելով ԼՂ հակամարտության կարգավորման խնդրի մասին, երկուստեք ընդգծվել է, որ հակամարտությունը կարող է լուծվել միմիայն խաղաղ բանակցությունների ճանապարհով: Նախագահ Սարկոզին նշելով, որ Ֆրանսիան հանդիսանում է ԵԱՀԿ Մինսկի խմբի համանախագահող երկրներից մեկը, հավելել է, թե այս հարցում, անշուշտ, իր դիրքորոշումը կարտահայտի նաև Ադրբեջանի նախագահին, որի այցը Ֆրանսիա սպասվում է առաջիկա նոյեմբերին:
Հանդիպման ավարտին մեկ անգամ ևս ընդգծվել է Հայաստանի և Ֆրանսիայի ներկայիս հարաբերությունների առանձնաշնորհյալ մակարդակը և այն պահպանելու ու առավել զարգացնելու կարևորությունը:
Հոկտեմբերի 26-ին Սերժ Սարգսյանը հանդիպում է ունեցել Շառլ Ազնավուրի հետ, երեկոյան ՀՀ վարչապետը նաև հարցազրույց է տվել ֆրանսիական «Ֆիգարո» օրաթերթին, «Պոլիտիք ինտերնացիոնալ» պարբերականին, հանդիպել՝ Ֆրանսիայում ուսանող հայ երիտասարդների հետ:
Վաղը` հոկտեմբերի 27-ին, ՀՀ վարչապետ Սերժ Սարգսյանը կվերադառնա Երևան:
