Այս բաժինը հնարավորություն է տալիս գրավոր արտահայտել Ձեր կարծիքը, տեսակետը և դիրքորոշումը: Ի տարբերություն դիմումների, նամակները պաշտոնական ընթացակարգով քննության չեն առնվում:

Ձեր պաշտոնական դիմումը ՀՀ կառավարությանն այլևս թափանցիկ ընթացակարգ ունի: Մեր կայքի շնորհիվ Դուք կարող եք տեղեկանալ, թե կառավարության որ մարմնին կամ պաշտոնյային է Ձեր առձեռն հանձնած կամ փոստով ուղարկած դիմումը վերահասցեագրվել:

Որոնում

iGov.am iPhone/iPad application Այսուհետ կարող եք օգտվել մոբայլ սարքերի համար iGov.am հավելվածից, որը հնարավոր է ներբեռնել AppStore-ում և Google Play-ում:

Թեժ գիծ

Տեղեկատվության ազատության ապահովման պատասխանատու
Ներքին և արտաքին ազդարարման պատասխանատու

1-17(զանգն անվճար է)

+374 (10) 527-000(արտերկրից զանգերի համար)

Պաշտոնական էլ. փոստ

(միայն www.e-citizen.am համակարգով ծանուցումների համար)

Էլ. կառավարում

Պաշտոնական լրահոս

հինգշաբթի, 25 հոկտեմբերի 2007


ՀՀ վարչապետ Սերժ Սարգսյանը հոկտեմբերի 24-ին Վաշինգտոնից ժամանել է Ֆրանսիա, որտեղ սկսվել է ՀՀ կառավարության ղեկավարի պաշտոնական այցն այդ երկիր: Այցի առաջին օրը Փարիզում Ֆրանսիայի Սենատի և Ազգային Ժողովի անդամների, քաղաքապետների, ֆրանսահայ գլխավոր կազմակերպությունների ղեկավարների մասնակցությամբ երեկոյան տեղի է ունեցել մեծ ընդունելություն ՀՀ վարչապետ Սերժ Սարգսյանի պատվին: Բավականին ներկայացուցչական այդ հավաքույթի ժամանակ վարչապետը հանդես է եկել ողջույնի խոսքով, որում, մասնավորապես, ասել է.


«Սրբազան հայրեր,


Հարգելի պարոն նախարար,


Հարգելի սենատորներ և պատգամավորներ,


Հարգելի դեսպաններ,


Հարգելի քաղաքապետներ և քաղաքային խորհրդի անդամներ,


Ֆրանսիայի հայկական հաստատությունների հարգելի ղեկավարներ,


Տիկնայք և պարոնայք,


Ուրախ եմ ձեզ հետ հանդիպելու համար և շատ գոհ եմ, որ այսպիսի բազմությամբ հավաքվել եք այս երեկոյին: Դա վկայում է ձեր հավատարմությունը հայ-ֆրանսիական բարեկամությանը: Ձեզնից շատերին Հայաստանում շատ լավ են ճանաչում և հարգում որպես այդ բարեկամության այսօրվա կերտողների, ինչի կապակցությամբ ես ուզում եմ իմ երախտագիտությունը հայտնել ձեզ: Մենք անձամբ բազմաթիվ առիթներ ենք ունեցել Հայաստանում և այստեղ՝ Ֆրանսիայում ձեզ հետ միասին զրուցելու մեր ներկայի և ապագայի մասին: Այսօր ես գտնվում եմ այստեղ ձեր երկրի բարձր ղեկավարության հետ քննարկելու հայ-ֆրանսիական օրակարգի կարևոր հարցերը և մեր համագործակցության հեռանկարները, և վստահ եմ, որ մեր հանդիպումները, ինչպես միշտ, կընթանան փոխըմբռնման մթնոլորտում:


Իմ այս վստահությունը պատահական չէ, այն հիմնված է ինչպես մեր անցյալ, այնպես էլ հատկապես ներկա ջերմ և սերտ կապերի վրա, որոնք առանց վարանելու մենք բնորոշում ենք որպես առանձնաշնորհյալ: Մեր երկրների բարձր ղեկավարության միջև հաստատված փոխըմբռնումը և սերտ ու հաճախակի շփումներն արդեն դարձել են ավանդական: Իսկապես տարի չի անցնում, որ մեր նախագահները մի քանի անգամ չհանդիպեն միմյանց: Էլ չեմ խոսում կառավարության անդամների, խորհրդարանականների, տեղական իշխանությունների ներկայացուցիչների փոխայցելությունների մասին, որոնք բազմաթիվ են: Հավատացնում եմ, որ այս մակարդակով և այս ծավալի համագործակցությունը եզակիներից է ոչ միայն եվրոպական երկրների առումով:


Հանձինս Ֆրանսիայի մենք Եվրոպայում ունենք մեր հավատարիմ գործընկերը, որն անվերապահորեն աջակցում է եվրոպական կառույցներում Հայաստանի հետևողական ընդգրկմանը: Այս առումով մենք բարձր ենք գնահատում հատկապես ԵՄ Հարևանության քաղաքականության շրջանակներում Ֆրանսիայի կարևոր աջակցությունը:


Ֆրանսիան անկեղծորեն շահագրգռված է Հարավային Կովկասում լարվածության թուլացման և կայունության հաստատման մեջ և կառուցողական ջանքեր է գործադրում այդ ուղղությամբ: Դուք բոլորդ գիտեք Ֆրանսիայի օգտակար ներառվածությունը ԵԱՀԿ Մինսկի խմբի մյուս համանախագահող երկրների՝ ԱՄՆ-ի և Ռուսաստանի հետ Լեռնային Ղարաբաղի հակամարտության կարգավորման բանակցություններում:


Ֆրանսիայի հետ այսօր մենք հաջողությամբ համագործակցում ենք ամենաբազմազան ոլորտներում: Այսօր Հայաստանում ֆրանսիական կապիտալով գործում են 120 ձեռնարկություններ: Այս թիվը տպավորիչ է, հատկապես որ դրանց մեջ առկա են համաշխարհային հեղինակության անուններ՝ «Ալկատել», «Վեոլիա», «Սոր», «Կրեդի Ագրիկոլ», «Էր Ֆրանս», «Պեռնո Ռիկար» և այլն: Պատրաստվում են մեր երկիր մուտք գործել «Սանոֆի-Ավենտիսը», «Սոսիետե Ժեներալը»:


Մեր կառավարությունը մեծ կարևորություն է տալիս մշակութային, գիտական և կրթական փոխանակումներին և խրախուսում այս ոլորտներում համատեղ ծրագրերը: Ֆրանսասիրությունը և ֆրանսախոսությունը ավանդականորեն հատուկ են հայ հասարակությանը և այս առումով բնական եմ դիտում Երևանի ֆրանսիական համալսարանի հաջողությունը: Գիտեմ, որ հակառակ իր երիտասարդ տարիքին, այն Ֆրանսիայի տարածքից դուրս լավագույն ֆրանսիական համալսարաններից մեկն է աշխարհում: Այն նաև Հայաստանի լավագույն բարձրագույն կրթական հաստատություններից մեկն է, և իսկապես մենք գոհ ենք այս համատեղ ծրագրից:


Հեռանկարային և օգտակար համագործակցություն է ծավալվում ապակենտրոնացված մակարդակով: Հայաստանի և Ֆրանսիայի 25-ական քաղաքների և վարչական միավորների միջև այսօր հաստատված են եղբայրական կապեր: Եթե նրանցից յուրաքանչյուրը տարեկան իրականացնում է 2-3 ծրագիր, իսկ դա այդպես է, ընդհանուր թիվը դառնում է բավականին տպավորիչ: Եվ ես կրկին շնորհակալություն եմ հայտնում այստեղ ներկա քաղաքապետներին և քաղաքային ու շրջանային խորհրդի անդամներին, ինչպես նաև Ֆրանսիա-Հայաստան խորհրդարանական բարեկամական խմբի անդամներին, որոնք այս յուրօրինակ համագործակցության ճարտարապետներն են:


Հայ-ֆրանսիական բարեկամության ամրապնդման գործում անուրանալի է ֆրանսահայության դերը: Ֆրանսահայերը կենդանի կամուրջն են մեր երկրների ու ժողովուրդների միջև: Մենք իրավամբ հպարտանում ենք այն մեծ անուններով, որ ծագումով հայերը տվել են Ֆրանսիային: Մեր կառավարությունը բարձր է գնահատում նաև մարդասիրական, աողջապահության և կրթության ոլորտներում այն բազմաթիվ ծրագրերը, որ ֆրանսահայ կազմակերպություններն ու առանձին անհատներ իրականացնում են Հայաստանում: Եվ ես ուզում եմ այստեղ սրտանց շնորհակալություն հայտնել բոլոր նրանց, ովքեր ներկայացնում են ֆրանսահայությունը՝ ի դեմս հոգևոր պետերի, Ֆրանսահայ կազմակերպությունների համակարգող խորհրդի նախագահի, հայկական հաստատությունների ղեկավարների, գործարարների, իրավաբանների, բժիշկների, մտավորականների և լրագրողների:


Ես կցանկանայի խոսել մի իրադարձության մասին, որն, անկասկած, մեր հարաբերությունների պատմության մեջ այլևս անշրջելի էջ է: Դա Ֆրանսիայում Հայաստանի տարին է, որը կարծես մեր հարուստ ու հնագույն կապերի, մեր այսօրվա լեցուն առօրյայի հանրագումարը դարձավ: Հայաստանի բարձրագույն իշխանությունները, Հայաստանի կառավարությունը ի սկզբանե շատ մեծ կարևորություն տվեցին այս իրադարձությանը: Ֆրանսիայում Հայաստանի տարվա այդ մեծ ծրագիրը հնարավոր եղավ իրականացնել մեր երկրների պետական, հասարակական և մշակութային բազմաթիվ հաստատությունների միացյալ ջանքերի, այդ գործին նվիրված մարդկանց անդուլ աշխատանքի շնորհիվ:


Բարձր գնահատելով Ֆրանսիայի քաղաքական ղեկավարության ցուցաբերած առանձնահատուկ ուշադրությունը Հայաստանի տարվա նկատմամբ՝ ուզում եմ իմ խորին երախտագիտությունը հայտնել Ֆրանսիային, ձեր կառավարությանը, տեղական իշխանություններին, ձեր երկրի բոլոր այն հաստատություններին և անհատներին, որոնցից շատերը ներկա են այս երեկոյին, որոնց ջանքերի ու բարյացկամության շնորհիվ Հայաստանի տարին վերածվեց բարեկամության իսկական տոնի:


Համոզված եմ, որ Հայաստանի տարին վճռական խթան կհանդիսանա ոչ միայն մշակութային, այլև տնտեսական, կրթական և գիտական հարաճուն փոխանակումների, ինչպես նաև պարզապես մարդկային սերտ կապերի խորացման համար և առավել կամրապնդի մեր երկրների ու ժողովուրդների միջև ավանդական բարեկամությունը:


Այսօր ես լուրջ հիմքեր ունեմ պնդելու, որ մեր ժողովուրդների միջև փոխադարձ համակրանքի այս մթնոլորտը շարունակաբար խորանալու է նաև ապագայում: Այդ կապակցությամբ ինձ համար մի ուշագրավ դիտարկում եմ արել վերջերս: Առավոտյան աշխատանքի գնալիս հաճախ եմ նկատում փոքրիկ տղաների ու աղջիկների, ովքեր դպրոց են շտապում ուսած պայուսակներով, որոնց վրա գրված է` "Arme'nie-mon amie" («Արմենի մոն ամի»): Կարծում եմ` տվյալ պարագայում այդ երեք բառերի մեջ ամփոփված է հայ-ֆրանսիական հարաբերությունների ամբողջ ապագան` ի դեմս մեծ աշխարհն իրենց համար նոր-նոր բացահայտող այդ մանչուկների, ովքեր այդ տարիքից արդեն գիտեն ինչ բան է բարեկամ երկիր, բարեկամ ժողովուրդ, ինչ բան է Ֆրանսիա:


Ամփոփելով ելույթս, սիրելի բարեկամներ, կրկին ողջունում եմ ձեզ: Թո՛ղ խաղաղությունն ու բարեկեցությունն ուղեկցեն մեր ժողովուրդներին և թո՛ղ հարատևի հայ- ֆրանսիական բարեկամությունը:


Թո՛ղ Աստված պահապան լինի Ֆրանսիային, թո՛ղ Աստված պահապան լինի Հայաստանին և կեցցե՛ հայ-ֆրանսիական բարեկամությունը»:


Այսօր նախատեսվում է ՀՀ վարչապետ Սերժ Սարգսյանի հանդիպումը Ֆրանսիայի վարչապետ Ֆրանսուա Ֆիյոնի հետ:


Օգոստոս 2020
ԵրկԵրքՉրքՀնգՈւրՇբթԿրկ
 12
3456789
10111213141516
17181920212223
24252627282930
31 

-

Արխիվ