երեքշաբթի, 16 հոկտեմբերի 2007
ՀՀ վարչապետ Սերժ Սարգսյանը հոկտեմբերի 17-ին կմեկնի Ամերիկայի Միացյալ Նահանգներ: Վարչապետի գլխավորած պատվիրակության կազմում են ՀՀ ֆինանսների և էկոնոմիկայի, Առևտրի և տնտեսական զարգացման, Գյուղատնտեսության նախարարները, ՀՀ նախագահի տնտեսական հարցերով գլխավոր խորհրդականը, ՀՀ Կենտրոնական բանկի նախագահը, ԱԳ նախարարի տեղակալը:
ԱՄՆ այցի շրջանակներում Հայաստանի կառավարական պատվիրակությունը կմասնակցի Համաշխարհային բանկի և Արժույթի միջազգային հիմնադրամի տարեկան համաժողովին ու Հայ-ամերիկյան տնտեսական համագործակցության միջկառավարական հանձնաժողովի նիստին:
Հայաստանի կառավարության ղեկավարը հոկտեմբերի 18-ին կայցելի Պենտագոն և հանդիպում կունենա ԱՄՆ պաշտպանության քարտուղար Ռոբերտ Գեյթսի հետ: Նույն օրը Սպիտակ տանը կկայանա ՀՀ վարչապետ Սերժ Սարգսյանի հանդիպումը ԱՄՆ փոխնախագահ Ռիչարդ Չեյնիի հետ: «Հազարամյակի մարտահրավեր» կորպորացիայի կենտրոնակայանում տեղի կունենա Սերժ Սարգսյանի հանդիպումը կորպորացիայի ղեկավար Ջոն Դանիլովիչի հետ:
ՀՀ վարչապետի գլխավորած պատվիրակությունը հոկտեմբերի 18-ի երեկոյան Վաշինգտոնից կմեկնի Լոս Անջելես, որտեղ հոկտեմբերի 19-ին նախատեսվում է ՀՀ վարչապետի հանդիպումը «Լոս Անջելես Թայմս»-ի խմբագրային խորհրդի հետ: Նույն օրը կկայանա վարչապետի հանդիպումը Լինսի հիմնադրամի ղեկավարների հետ:
ՀՀ վարչապետի գլխավորած պատվիրակությունը հոկտեմբերի 20-ին կմեկնի Վաշինգտոն, որտեղ հոկտեմբերի 21-ին Սերժ Սարգսյանը հանդիպում կունենա ԱՄՀ կառավարիչ-տնօրեն Դոմինիկ Ստրաուս-Քանի հետ:
ՀՀ կառավարական պատվիրակության անդամները հոկտեմբերի 22-ին Միացյալ Նահանգների մայրաքաղաքում կմասնակցեն Համաշխարհային բանկի և Արժույթի միջազգային հիմնադրամի տարեկան համաժողովին: Այնուհետև վարչապետ Սերժ Սարգսյանը կմեկնի ԱՄՆ Սենատ` հանդիպելու Սենատի մեծամասնության առաջնորդ Հարրի Ռիդի հետ:
Հոկտեմբերի 23-ին ԱՄՆ պետդեպարտամենտում ՀՀ վարչապետ Սերժ Սարգսյանն առանձնազրույց կունենա ԱՄՆ Պետքարտուղարի տեղակալ Ռուբեն Ջեֆերիի հետ: Հայաստանի կառավարության ղեկավարը նույն օրը կմասնակցի և բացման խոսքով հանդես կգա Հայ-ամերիկյան աշխատանքային խմբի հանդիպման նիստում:
Հոկտեմբերի 23-ին նախատեսվում է նաև ԱՄՆ Պետդեպարտամենտում ՀՀ վարչապետի հանդիպումը ԱՄՆ Պետքարտուղար Կոնդոլիզա Ռայսի հետ:
Վարչապետը Վաշինգտոնում կհանդիպի ամերիկահայ կազմակերպությունների ղեկավարության հետ ևս:
Հոկտեմբերի 23-ին, ՀՀ վարչապետ Սերժ Սարգսյանի ղեկավարած պատվիրակությունը կմեկնի Փարիզ: