ուրբաթ, 1 փետրվարի 2002
Այսօր ՀՀ վարչապետ Անդրանիկ Մարգարյանն ընդունեց Հայաստանում Ֆրանսիայի նորանշանակ դեսպան Անրի Կյունիին: Շնորհավորելով դեսպանին, վարչապետը հույս հայտնեց, որ նա հաջողությամբ կշարունակի այն բարի ավանդույթները, որ ձևավորվել էին իր նախորդի՝ պրն Լեգրայի պաշտոնավարման շրջանում: Անդրանիկ Մարգարյանն ընդգծեց, որ համագործակցության համար բոլոր նախադրյալները կան՝ երկու երկրների միջև գոյություն ունեն բարձր մակարդակի հարաբերություններ, ինչը Հայաստանի արտաքին քաղաքականության ձեռքբերումներից մեկն է: Սակայն, ըստ վարչապետի, քաղաքական հարաբերությունների մակարդակն այսօր համահունչ չէ տնտեսական գործակցության մակարդակին, որտեղ չնայած կան հաջողված օրինակներ, բայց դրանք դեռևս բավարար չեն. «Մենք շահագրգիռ ենք, որ ֆրանսիական կապիտալը հիմնավորվի հայաստանյան շուկայում, որտեղ փոխգործակցությունն ընդլայնելու և զարգացնելու մեծ հանարավորություներ կան», -նշեց վարչապետը:
Պարոն Կյունին վստահեցրեց, որ կշարունակի հաստատված բարի ավանդույթները, շնորհակալություն հայտնեց վարչապետին՝ աջակցելու պատրաստակամության համար, նշելով, որ իր երկիրը մեծապես կարևորում է տարածաշրջանի կայունությունը և շարունակելու է դրա հաստատմանն ուղղված ջանքերի գործադրումը, այդ թվում՝ ԼՂՀ հակամարտության խաղաղ կարգավորման գործում:
Հանդիպման ընթացքում անդրադարձ եղավ տնտեսական դաշտում, նաև կրթության ոլորտում գործակցության հնարավոր ուղղություններին ու ծրագրերին:
