երկուշաբթի, 17 սեպտեմբերի 2007
ՀՀ վարչապետ Սերժ Սարգսյանի ուղերձը այսօր «Մարիոթ-Արմենիա» հյուրանոցում տեղի ունեցած «Ինովացիոն ոլորտի զարգացումը Արևելյան Եվրոպայի և Կենտրոնական Ասիայի երկրներում - 2007» համաժողովի բացմանը
Համաժողովի հարգելի մասնակիցներ,
Ողջունում եմ ձեզ «Նորարարությունների խթանումն Արևելյան Եվրոպայի և Կենտրոնական Ասիայի երկրներում-2007» միջազգային համաժողովի բացման առիթով: Ուրախ եմ, որ այսօր շուրջ 20 երկրներից Հայաստանի մայրաքաղաք Երևանում է հավաքվել գործարարների, փորձագետների և պաշտոնյաների այսպիսի ներկայացուցչական կազմ` քննարկելու հարցեր, որոնք ներկա արագ փոփոխվող իրականության պայմաններում չափազանց կարևոր են մեր երկրներից յուրաքանչյուրի համար:
Համաշխարհային տնտեսությունը լուրջ վերափոխումների ժամանակահատվածում է. այսօր արդեն ակնհայտ է, որ մտավոր տեխնոլոգիաները հաստատապես ստանձնում են տնտեսական առաջընթացի լոկոմոտիվի դերը: Սա մի գործընթաց է, որին անմասն չեն կարող մնալ նաև մեր երկրները: Համաշխարհային տնտեսության զարգացման միտումներին համաքայլ ընթանալու համար ինովացիոն ոլորտի ձևավորումն ու տնտեսության բոլոր ճյուղերում նպատակաուղղված ներդրումն այսօր այլընտրանք չունի:
Համաժողովի քննարկումների առարկան Հայաստանի կառավարության կողմից որդեգրված քաղաքականության հիմնական ուղղություններից է: Մենք հատուկ ուշադրություն ենք դարձնելու բարձր տեխնոլոգիական մշակումների, ինովացիոն գործունեության և գիտական-ինովացիոն հենքով տնտեսության զարգացման խնդիրներին: Այս տեսանկյունից մենք կարևորում ենք պետական և մասնավոր հատվածների համագործակցությամբ իրականացվող ծրագրերը, մասնավոր հատվածի և երկրի ընդհանուր տնտեսության մրցունակությունը խթանող միջոցառումների իրականացումը, համապատասխան ենթակառուցվածքների, այդ թվում նաև ինկուբատորների և տեխնոպարկերի ստեղծումը:
Վստահ եմ, որ այս համաժողովը հնարավորություն կընձեռի տեղական մասնագետներին ծանոթանալ Արևելյան Եվրոպայի և Կենտրոնական Ասիայի տարածաշրջանում գոյություն ունեցող փորձին: Կարծում եմ, որ մասնակիցների այսպիսի ներկայացուցչական կազմը վկայում է այն մասին, որ Հայաստանը նույնպես հետաքրքրություն է ներկայացնում միջազգային ճանաչում ունեցող գիտնականների և գործարարների համար, և հիմք է տալիս հուսալու, որ սա հաջող սկիզբ կլինի արտերկրի փորձառու գործընկերների հետ հետագա արդյունավետ համագործակցության և մեր երկրում այդ փորձի նպատակաուղղված տեղայնացման գործընթացում:
Մեկ անգամ ևս ողջունում եմ ձեզ և մաղթում արդյունավետ ու բեղմնավոր աշխատանք:
