ուրբաթ, 14 դեկտեմբերի 2001
Այսօր ՀՀ վարչապետ Անդրանիկ Մարգարյանն ընդունեց Հայաստանում ԱՄՆ նորանշանակ դեսպան Ջոն Օրդուեյին: Վարչապետը շնորհավորեց պրն Օրդուեյին մեր երկրում դիվանագիտական առաքելությունն սկսելու առիթով և հույս հայտնեց, որ հայ-ամերիկյան հարաբերությունները կշարունակվեն հաջողությամբ զարգանալ, ինչպես նախկին դեսպանների օրոք: Ըստ վարչապետի, Հայաստանը համոզված լինելով տարածաշրջանում կայունության հաստատման և զարգացման նպաստավոր պայմանների ստեղծման գործում ԱՄՆ շահագրգռության մեջ, շարունակում է համագործակցությունն ընդլայնելու իր քաղաքականությունը՝ փորձելով բարձր մակարդակի քաղաքական հարաբերություններից անցնել տնտեսական սերտ գործակցության: Անդրանիկ Մարգարյանը, այդ առումով կարևորեց հատկապես հայ-ամերիկյան աշխատանքային խմբի ակտիվ գործունեությունը: Նա ցավով նշեց, որ սեպտեմբերի 11-ի ողբերգական իրադարձությունները խոչընդոտեցին նաև Վաշինգտոնում նախատեսված՝ աշխատանքային այդ խմբի հանդիպումը, որտեղ գործնական մի շարք հարցեր պետք է քննարկվեին:
Նորանշանակ դեսպան պրն Ջոն Օրդուեյը ևս շեշտեց, որ երկու երկրների համագործակցությունն ամուր հիմքերի վրա է կառուցված, ինչը, ըստ նրա, համոզվածություն է ներշնչում հետագայում էլ նույն ոգով շարունակելու գործակցությունը և զարգացնելու այն:
Հանդիպմանը անդրադարձ եղավ հակաահաբեկչության դեմ պայքարում, տարածաշրջանի երկրների հետ համագործակցության, ԼՂՀ հակամարտության խաղաղ կարգավորման գործում և մի շարք այլ հարցերում համատեղ ջանքերին:
Դեսպան Օրդուեյի խնդրանքով ՀՀ վաչապետը ներկայացրեց նաև կառավարության տնտեսական քաղաքականության հիմնական ուղղությունները, 2002թ. ծրագրերը, Առևտրի համաշխարհային կազմակերպությանը մեր երկրի անդամակցության գործընթացի ներկայիս փուլը:
Phone: 52-87-12
E-mail: press@arminco.com
