չորեքշաբթի, 25 հուլիսի 2007
ՀՀ վարչապետ Սերժ Սարգսյանն այսօր ընդունել է ՀՀ-ում Եգիպտոսի արտակարգ և լիազոր դեսպան Աբլա Մոհամեդ Աբդ-Էլ Ռահման Օսմանին, որն ավարտում է իր դիվանագիտական առաքելությունը մեր երկրում:
Վարչապետը շնորհակալություն է հայտնել դեսպանին` պաշտոնավարման ընթացքում հայ-եգիպտական հարաբերությունների ամրապնդմանն ու զարգացմանն ուղղված ջանքերի համար և հետագա աշխատանքում մաղթել հաջողություններ: Հայ-եգիպտական հարաբերությունները, վարչապետի խոսքերով, բխում են երկու ժողովուրդների դարավոր բարեկամությունից, որը երկու երկրների իշխանությունները պարտավոր են տարեցտարի ավելի ամրապնդել:
Սերժ Սարգսյանն ընդգծել է, որ տնտեսական հարաբերությունները դեռևս չեն համապատասխանում քաղաքական հարաբերությունների մակարդակին, և զգալի աշխատանք կա տանելու` առկա ներուժն ու հնարավորությունները լիարժեք օգտագործելով, ցանկալի արդյունքին հասնելու համար:
Դեսպան Աբլա Մոհամեդ Աբդ-Էլ Ռահման Օսմանը ևս նշել է, որ Հայաստանի և Եգիպտոսի միջև անցած տարիներին կնքվել են բազմաթիվ փաստաթղթեր, իրավական հիմքն ապահովված է, և ժամանակն է ավելի ակտիվ աշխատանք իրականացնել ապրանքաշրջանառության ծավալների մեծացման ու տնտեսական փոխգործակցության զարգացման ուղղությամբ:
ՀՀ-ում Եգիպտոսի դեսպանը, Հարավային Կովկասում Հայաստանը համարելով ելք դեպի Միջինասիական երկրներ, նշել է, թե Հայաստանի արտադրանքն էլ կարող է Աֆրիկյան և Արաբական աշխարհների երկրներ հասնել Եգիպտոսի միջոցով, որի հետ այդ երկրները ձևավորված առևտրային հարաբերություններ և համագործակցություն ունեն:
Հանդիպման ընթացքում քննարկվել են տարբեր ոլորտներում ներդրումային ծրագրեր իրականացնելու և փոխգործակցությունը զարգացնելու հարցեր:
Հայ-եգիպտական հարաբերությունների ամրապնդման գործում կարևորվել է նաև եգիպտահայ համայնքի դերը:
Ընդգծելով, որ զբոսաշրջության և մի շարք այլ բնագավառներում եգիպտական փորձը բավականին օգտակար կարող է լինել Հայաստանի համար, վարչապետը կարևորել է նաև այդ փորձի փոխանակումը, միաժամանակ նշել միջկառավարական հանձնաժողովի աշխատանքի ակտիվացման անհրաժեշտությունը:
Հանդիպման ավարտին երկուստեք հույս է հայտնվել, որ Հայաստանում հաջորդ դեսպանը նույնպիսի շահագրգռությամբ և պատրաստակամությամբ կշարունակի հայ-եգիպտական բարեկամության և հարաբերությունների ամրապնդմանն ուղղված գործունեությունը: Սերժ Սարգսյանը խնդրել է շնորհակալություններ փոխանցել Եգիպտոսի վարչապետին` իր երկիր այցի հրավերը վերահաստատելու համար:
