ուրբաթ, 29 հունիսի 2007
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 16 բարեգործական ծրագիր: Մասնավորապես, քննարկվել և հաստատվել են՝ «Հայաստան» համահայկական հիմնադրամի կողմից իրականացվող Երևան քաղաքի «Պուշկինի անվան զբոսայգու բարեկարգման աշխատանքների», «Հրաշք» մանկապարտեզի սանհանգույցների վերանորոգման», «Ամենամյա հոգաբարձուների նիստի համար հոբելյանական հանդեսի տպագրության և անհատույց բաշխման», «ՀՀ Տավուշի մարզի Լուսաձոր, Ակնաղբյուր, Խաշտարակ, Լուսահովիտ և Դիտավան գյուղերի ջրամատակարարման համակարգերի ուսումնասիրության և հետազոտական աշխատանքների», «ՀՀ Սյունիքի մարզի Խնձորեսկ գյուղի միջնակարգ դպրոցի համար գույքի պատրաստման, գնման, տեղափոխման և անհատույց տեղադրման» և «Սիսիանի հիվանդանոց» ՓԲԸ-ի գույքի պատրաստման, գնման, տեղափոխման և անհատույց տեղադրման», «Օժանդակություն ԼՂՀ «Հյուսիս-հարավ» ավտոմայրուղու Ստեփանակերտ-Կարմիր Շուկա 9-21 կմ հատվածի 12.4 կմ երկարության չորրորդ կարգի ճանապարհի կառուցման աշխատանքներին», «ԼՂՀ Հադրութի շրջանի Ակնաղբյուր գյուղի դպրոցի կցակառույցի իրականացման նախագծման», «Օժանդակություն ԼՂՀ Հադրութի շրջանային հիվանդանոցի կառուցմանը» և «Մեծ Թաղլար, Ազոխ ու Դրախտիկ գյուղերի ջրամատակարաման համակարգի կառուցմանը», «ԼՂՀ Հադրութի շրջանի Տող-Հադրութ հատվածամասի գազատարի կառուցման աշխատանքների» ծրագրերը:
Հաստատվել են նաև «ԿԱԶԱ» շվեյցարական մարդասիրական հիմնադրամի կողմից իրականացվող «ՀՀ Արագածոտնի մարզի «Մաստարայի միջնակարգ դպրոց» ՊՈԱԿ-ի եռահարկ առաջին մասնաշենքի վերակառուցման» և «Լեոնարդ Գմյուր» երեխայի պաշտպանության սոցիալական հիմնադրամին գույքի նվիրաբերության» ծրագրերը:
Նիստում քննարկվել և հաստատվել են «Վորլդ Վիժն Ինթերնեյշնլ» միջազգային բարեգործական կազմակերպության կողմից իրականացվող «Դպրոցների բարեկարգում ՀՀ Սյունիքի մարզի Տանձավեր գյուղում և Կապան քաղաքում» և Խաղահրապարակների վերանորոգում Կապան քաղաքի Բաղաբերդ, Հալիձոր և Ձորք թաղամասերում» ծրագրերը ևս, ինչպես նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
