չորեքշաբթի, 27 հունիսի 2007
ՀՀ վարչապետ Սերժ Սարգսյանն այսօր հանդիպում է ունեցել պետական այցով Հայաստան ժամանած Հունաստանի Հանրապետության նախագահ Կարոլոս Պապուլիասի և նրա գլխավորած պատվիրակության հետ:
Վարչապետը, ողջունելով բարձրաստիճան հյուրին և պատվիրակության անդամներին, նշել է, որ ՀՀ կառավարությունը պատրաստակամ է իր իրավասությունների շրջանակներում հնարավոր բոլոր ջանքերը գործադրել Հայաստանի և Հունաստանի նախագահների միջև ձեռք բերված պայմանավորվածություններն իրականացնելու համար՝ ի նպաստ երկու երկրների ու բարեկամ հայ և հույն ժողովուրդների: Սերժ Սարգսյանը երախտագիտություն է հայտնել մինչ այժմ մեր երկրին ամենատարբեր ոլորտներում Հունաստանի ցուցաբերած աջակցության համար, հատկապես ընդգծելով ռազմական բնագավառում համագործակցությունն ու աջակցությունը: Վարչապետն ասել է, թե երկար տարիներ աշխատելով անվտանգության բնագավառում և ի պաշտոնե շփվելով Հունաստանի պաշտոնական գերատեսչության ղեկավարության հետ, մշտապես զգացել է նրանց ջերմ բարեկամական վերաբերմունքը և համագործակցության պատրաստակամությունը: Վարչապետը կարևորել է այդ գործակցության ընդլայնումն ու հետագա զարգացումը, հատկապես այս ժամանակաշրջանում, երբ Հայաստանը ՆԱՏՕ-ի հետ իրականացնում է Անհատական գործողությունների ծրագիր և Հունաստանի փորձն ու օժանդակությունը չափազանց օգտակար կարող են լինել: Սերժ Սարգսյանը համաձայնել է Հունաստանի նախագահի այն տեսակետին, թե մեր բարդ տարածաշրջանում բարեկամներ և ընդհանուր շահեր հետապնդող հարևան երկրներն այնքան էլ շատ չեն, ուստի հանուն բարեկամ ժողովուրդների անվտանգության և բարեկեցության ապահովման, անհրաժեշտ է առկա խնդիրների լուծման ու զարգացման ծրագրերի իրագործման հարցում հնարավորինս համատեղել ջանքերը:
Նախագահ Կարոլոս Պապուլիասը ցավով է նշել, որ այնպիսի դժվարին և անընդհատ խնդիրներ հարուցող հարևանը, ինչպիսին Թուրքիան է, եթե ի վերջո փոխվեր և առաջնորդվեր եվրոպական ընտանիքին հարիր արժեքներով, ապա ե՛ւ Հունաստանը, ե՛ւ Հայաստանը ստիպված չէին լինի սոցիալական ծրագրերի հաշվին երկրի համախառն ներքին արդյունքից ավելի մեծ միջոցներ հատկացնել պաշտպանության և անվտանգության ապահովման խնդիրներին: Հունաստանի նախագահը գոհունակությամբ է խոսել ոչ միայն երկկողմ քաղաքական հարաբերությունների բարձր մակարդակի մասին, այլ նաև միջազգային ասպարեզում Հայաստանի և Հունաստանի շահագրգիռ համագործակցության և միմյանց պատրաստակամորեն աջակցություն ցուցաբերելու մասին: Նա նշել է, թե իր երկիրն արդեն որոշակի փորձառություն ունի եվրաինտեգրման ու եվրաատլանտյան շրջանակներում գործունեության հարցում և Հայաստանի արտաքին քաղաքականության մեջ կարևորվող նպատակների իրագործման ճանապարհին պատրաստ է օգտակար լինել այդ փորձով:
Հանդիպման ընթացքում երկուստեք կարևորվել է տնտեսական փոխգործակցության զարգացման գործում Հայ-հունական միջկառավարական հանձնաժողովի ակտիվ գործունեությունը: Համագործակցության ոլորտների հեռանկարայնության առումով նշվել են հատկապես գյուղատնտեսության, առետրի և զբոսաշրջության, ռազմական, կրթության ոլորտները, որոնք, ըստ ՀՀ վարչապետի, կարևորված են նաև ՀՀ կառավարության գործունեության առաջիկա հինգ տարիների ծրագրում:
Հանդիպման ավարտին Հունաստանի նախագահը վստահություն է հայտնել, որ մարդկային ներուժով, իմաստնությամբ և կարողություններով միմյանց շատ նման ու դարավոր պատմություն ունեցող հույն և հայ ժողովուրդները պատմության ընթացքում կարողացել են հաղթահարել բոլոր դժվարությունները և այսուհետ ևս, աջակցելով ու հարաբերություններն ավելի սերտացնելով՝ կկարողանան մեծ առաջընթաց ու ձեռքբերումներ ունենալ:
