չորեքշաբթի, 28 նոյեմբերի 2001
ՀՀ վարչապետ Անդրանիկ Մարգարյանը նոյեմբերի 29-ին կմեկնի Մոսկվա՝ մասնակցելու նույն օրը ՌԴ մայրաքաղաքում տեղի ունենալիք ԱՊՀ անդամ երկրների կառավարությունների ղեկավարների խորհրդի նիստին, որին մեկ օր հետո կհաջորդի պետությունների ղեկավարների խորհրդի նիստը:
ՀՀ վարչապետի գլխավորած պատվիրակության կազմում են կառավարության աշխատակազմի ղեկավար-նախարար Մանուկ Թոփուզյանը, ԱՊՀ մարմիններում ՀՀ մշտական լիազոր ներկայացուցիչ Սուրեն Հարությունյանը, ՌԴ-ում ՀՀ արտակարգ և լիազոր դեսպան Սուրեն Սահակյանը, ԱՊՀ տնտեսական խորհրդին կից տնտեսական հարցերի հանձնաժողովում ՀՀ լիազոր ներկայացուցիչ Արտակ Վարդանյանը, կառավարության աշխատակազմի և նախարարությունների համապատասխան վարչությունների ղեկավարներ:
ԱՊՀ անդամ երկրների կառավարությունների ղեկավարների հերթական այս հանդիպմանը նախատեսվում է քննարկել տնտեսական, առևտրային, հակաահաբեկչության, տեղեկատվական, կրթամշակութային և այլ բնագավառներում համագործակցությանը վերաբերող շուրջ երկու տասնյակ հարցեր, այդ թվում՝ ԱՊՀ մասնակից պետությունների ազգային շուկաներ ապրանքների ու ծառայությունների առաջանցման համար տեղեկատվական մարքեթինգային կենտրոնների ցանցի ստեղծման՝ մինչև 2005թ. ընկած ժամանակահատվածի միջպետական ծրագրի նախագիծը, որին ՀՀ կառավարությունը օրերս հավանություն տվեց, ինչպես նաև Համագործակցության անդամ պետությունների տարածքներում համատեղ հակաահաբեկչական միջոցառումների կազմակերպման ու անցկացման կարգի մասին Կանոնակարգի հաստատման արձանագրության նախագիծը: Կքննարկվեն նաև մշակույթի բնագավառում համագործակցության հիմնական միջոցառումների ծրագիրը, ԱՊՀ միասնական կրթական տարածքի ձևավորման հայեցակարգի իրագործման միջազգային ծրագրի նախագիծը և այլն:
Համագործակցության անդամ երկրների կառավարությունների ղեկավարները խորհրդի նիստում կլսեն ԱՊՀ գործունեության 10 տարիների արդյունքների և հեռանկարային խնդիրների վերաբերյալ աշխատանքային խմբի զեկույցը, կքննարկեն Հայրենական մեծ պատերազմում տարած հաղթանակի 60-ամյակի տոնակատարության նախապատրաստական աշխատանքների ծրագիրը:
