չորեքշաբթի, 13 հունիսի 2007
ՀՀ վարչապետ Սերժ Սարգսյանն այսօր ընդունել է հանրապետության ստեղծագործական միությունների ղեկավարներին, որոնք վարչապետին են ներկայացրել իրենց կազմակերպություններին հուզող արդիական մի շարք խնդիրներ: Մասնավորապես, անդրադարձ է եղել դեռևս 2006թ. ՀՀ Ազգային ժողով ներկայացված և օրակարգում ներառված «Ստեղծագործական միությունների մասին» ՀՀ օրենքի նախագծին, որը, ըստ վերոնշյալ միությունների ղեկավարների, իրենց համար կարևոր ու օրախնդիր հարց է, և ցանկալի է, որ այն նորընտիր խորհրդարանի կողմից առաջիկա աշնանային նստաշրջանում քննարկվի:
Վարչապետի հետ հանդիպմանը ներկայացվել են նաև հեռուստատեսությամբ ազգային մշակույթի քարոզչության, Երևանում հայ ժողովրդի բարեկամներին՝ Ֆ. Նանսենին, Ֆ. Վերֆելին և այլոց, նվիրված քանդակազարդ ծառուղու հիմնման առաջարկություններ: Հանդիպման մասնակիցները խոսել են հասարակական կազմակերպությունների կարգավիճակով գործող և տարբեր բնագավառներ ներկայացնող ներկայիս ստեղծագործական յոթ միությունների գործառույթների, նորանկախ Հայաստանի պայմաններում նրանց դերի և նշանակության, գործունեության արդյունավետ մեխանիզմների մշակման, պետական աջակցության հարցերի շուրջ ևս:
Վարչապետ Սերժ Սարգսյանն ընդունել է ստեղծագործական միությունների ղեկավարների առաջարկը՝ նման հանդիպումներին պարբերական բնույթ հաղորդելու վերաբերյալ, միաժամանակ ընդգծելով, որ ստեղծագործական միությունները պետք է ձերբազատվեն Խորհրդային միության ժամանակ գոյություն ունեցած նման միություններին բնորոշ գործունեության ձևերից և արդի իրողություններից ելնելով, նորովի ձևակերպեն իրենց խնդիրները:
