ուրբաթ, 1 հունիսի 2007
Երեխաների իրավունքների պաշտպանության օրվա կապակցությամբ և այդ բնագավառում երկարամյա ու բեղմնավոր գործունեության համար այսօր ՀՀ վարչապետ Սերժ Սարգսյանը շնորհակալագրերով խրախուսել է մի շարք հասարակական ու բարեգործական կազմակերպությունների: Մասնավորապես, ՀՀ կառավարության ղեկավարի կողմից շնորհակալագիր են ստացել «Փրկություն» հաշմանդամ երեխաների օգնության բարեգործական միություն, ՄԱԿ-ի մանկական հիմնադրամի հայաստանյան գրասենյակի երեխաների պաշտպանության ծրագրեր կազմակերպությունները, «Մի Օ ԷՅ ԷՖ» մանուկների բարեգործական հիմնադրամը, «Հույսի կամուրջ» հաշմանդամ երեխաների հասարակական բարեգործական կազմակերպությունը, «Նարեկացի» արվեստի միավորումը, «Զինվորի մայր» բարեգործական կոմիտե-հասարակական կազմակերպությունը, «Նախաբեմ» կրթամշակութային միությունը, «Նոր անուններ» հասարակական կազմակերպությունը, Հաշմանդամ երեխաների «Աստղիկ» միությունը, Ամերիկայի հայ օգնության ֆոնդի Հայաստանի մասնաճյուղը և «Հայաստանի մանկական ասոցիացիա» բարեգործական հասարակական կազմակերպությունը:
ՀՀ կառավարությունում այսօր կազմակերպված ընդունելության ժամանակ վարչապետ Սերժ Սարգսյանը վերոնշյալ կազմակերպություններին հանձնել է շնորհակալագրերը:
ՀՀ վարչապետին առընթեր կանանց խորհրդի համակարգող Կարինե Կիրակոսյանը երախտագիտություն է հայտնել երեխաների խնդիրներով մտահոգ հասարակական և բարեգործական կազմակերպություններին՝ տարիների ընթացքում իրենց կատարած աշխատանքի համար և նշել, որ ՀՀ վարչապետին առընթեր կանանց խորհուրդն ու Հանրապետական կուսակցության կանանց խորհուրդը միջնորդել են ՀՀ վարչապետին՝ նշված կազմակերպություններին խրախուսելու համար: Կ.Կիրակոսյանն ընդգծել է, որ երեխաների հետ կապված խնդիրները միշտ եղել են կառավարության ուշադրության կենտրոնում, իրենց օրենսդրական կարգավորումն են ստացել երեխաներին առնչվող շատ խնդիրներ: Եվ վարչապետի խրախուսանքին արժանացած կազմակերպություններն իրենց աշխատանքով նպաստել, օգնել են այդ խնդիրների լուծմանը:
Հանդիպման ավարտին ՀՀ վարչապետ Սերժ Սարգսյանը ՀՀ կառավարության անունից պատրաստակամություն է հայտնել շարունակել հատուկ խնամքի և հոգածության կարիք ունեցող որբ, հաշմանդամ, կարիքավոր երեխաների խնդիրների լուծմամբ զբաղվող կազմակերպություններին աջակցությունն ու նրանց հետ համագործակցությունը՝ շեշտելով, որ այդ կազմակերպություններն իրենց շնորհակալ ու անչափ կարևոր աշխատանքով աջակցում են նաև կառավարությանը:
