չորեքշաբթի, 12 սեպտեմբերի 2001
Սեպտեմբերի 12-ին տեղի ունեցավ ՀՀ կառավարության մարդասիրական օգնության կենտրոնական հանձնաժողովի հերթական նիստը, որը վարում էր հանձնաժողովի նախագահ Վ.Մովսիսյանը:
Հանձնաժողովը քննարկեց 2001-2002 թվականների ընթացքում իրականացվող 6 երկարաժամկետ բարեգործական ծրագիր:
ՀՀ գյուղատնտեսության նախարարությունը ներկայացրեց հանրապետությունում 2000 թվականի տևական երաշտի հետևանքների մեղմացման նպատակով Ռուսաստանի Դաշնության կառավարության կողմից որպես օգնություն ուղարկված աշնանացան ցորենի սերմացուի ներմուծման և բաշխման ծրագիրը:
Քննարկվեց և հաստատվեց իրանահայ բարերար Ադելինա Ստեփանյանցի միջոցներով «Հայ օգնության միություն» բարեգործական հասարակական կազմակերպության կողմից իրականացվող Դիլիջանի գյուղատնտեսական թեքումով N 4 դպրոցի նոր շենքի կառուցման ծրագիրը:
Փախստականների հարցերով նորվեգական խորհուրդը կիրականացնի Վայոց ձորի մարզի Սարավան և Գեղարքունիքի մարզի Դարանակ գյուղերում դպրոցի նոր շենքերի, իսկ Տավուշի մարզի Պտղավան գյուղում` փախստականների համար 22 առանձնատների կառուցման ծրագիրը:
Նմանատիպ ավելի ընդգրկուն ծրագիր կիրականացնի «Օթևան» երիտասարդ մարդկանց քրիստոնեական ընկերակցություն հասարակական կազմակերպությունը: Կազմակերպությունը ՄԱԿ-ի փախստականների հարցերով գերագույն հանձնակատարի Հայաստանյան գրասենյակի ֆինանսավորմամբ Երևանի Նուբարաշեն թաղամասում, Արտաշատում, Սիսիանում և Վանաձորի «Տարոն-3» թաղամասում հանրակացարանների և կիսավարտ շենքերի վերակառուցման-վերափոխման միջոցով 187 փախստականների ընտանիքների կապահովի բնակարաններով:
ԱՄՆ-ի «Հայաստանի զարգացման ծառայություններ» ընկերության հայկական մասնաճյուղը կլուծի Նոր-Խարբերդի մանկատունը շուրջօրյա խմելու ջրով ապահովելու հարցը: Այդ նպատակով կկառուցվի առանձին ջրագիծ:
Իր հերթական` «Կահույք` դպրոցներին» ծրագիրը կիրականացնի ԱՄՆ-ի Վերջին օրերի սրբերի բարեգործական կորպորացիայի հայաստանյան ներկայացուցչությունը: Ծրագրի շրջանակներում Արագածոտնի մարզի Կարբի, Նոր Եդեսիա, Հնաբերդ և Բայսզ գյուղերի դպրոցների համար կպատրաստվեն աշակերտական սեղաններ և նստարաններ:
Նիստում քննարկվեցին նաև առանձին բարեգործական ու հասարակական կազմակերպությունների հասցեով ուղարկված բարեգործական բեռների ներմուծման ու բաշխման, ինչպես նաև նախկինում հաստատված ծրագրերի իրականացման հետ անմիջականորեն կապված ու դրանց համար զգալի նշանակություն ունեցող գործարքների և այլ հարցեր:
