չորեքշաբթի, 26 հուլիսի 2006
Ռուս-վրացական սահմանի Վերին Լարս անցակետի փակման պատճառով Ռուսաստանից Վրաստան մուտք գործելու և ապա ՀՀ տեղափոխվելու նպատակով վրացական Էրգնեթի բնակավայրի մոտակայքում չգործող սահմանակետի մոտ հավաքված մեր հայրենակիցների Հայաստան տեղափոխման խնդիրը լուծելու համար, ՀՀ վարչապետ Անդրանիկ Մարգարյանի հանձնարարությամբ, երեկ երեկոյան ՀՀ արտգործնախարարությունում հանդիպում է տեղի ունեցել Հայաստանում Վրաստանի արտակարգ և լիազոր դեսպան Ռևազ Գաչեչիլաձեի հետ, որի ընթացքում պաշտոնական հուշագիր է փոխանցվել վրացական իշխանություններին, որպեսզի նրանք հնարավորության դեպքում, բարի կամք դրսևորելով, թույլատրեն վերոհիշյալ չգործող սահմանակետով մեր ավելի քան 100 հայրենակիցների տեղաշարժը Վրաստանով Հայաստան:
Նման իրավիճակներից խուսափելու նպատակով, միաժամանակ, հանձնարարվել է Ռուսաստանում ՀՀ դեսպանությանը և գլխավոր հյուպատոսություններին՝ զանգվածային լրատվամիջոցներով և այլ հնարավոր միջոցներով առավելագույն աշխատանք իրականացնել՝ Էրգնեթի բնակավայրի մոտակայքում գտնվող սահմանակետի չգործելու մասին ՀՀ քաղաքացիներին իրազեկելու ուղղությամբ, տեղեկացնելով, որ նրանք կարող են օգտվել Նովոռոսիյսկ-Փոթի լաստանավի հնարավորություններից:
Վրաստանի արտաքին գործերի նախարարությունից այսօր տեղեկացրել են, որ հարցի դրական լուծման առաջարկով նամակն ԱԳՆ-ն փոխանցել է իր կառավարությանը: Վերջինիս կողմից այն քննարկելուց հետո, ակնկալվում է որոշման շուտափույթ կայացում:
