ուրբաթ, 13 հուլիսի 2001
Այսօր տեղի ունեցավ ՀՀ կառավարության նիստ, որը վարեց վարչապետ Անդրանիկ Մարգարյանը:
Կառավարությունը հաստատեց Գեղարքունիքի մարզի առողջապահության համակարգի օպտիմալացման ծրագիրը: Նշվեց, որ ներկայիս համակարգը ուռճացված է, որի պահպանումը բյուջետային ֆինանսավորմամբ դարձել է անարդյունավետ: Փաստորեն, ՀՀ պետական բյուջեից հատկացվող միջոցները նպատակաուղղվում են ոչ թե բուժօգնության ապահովմանը, այլ առավելապես առողջապահական համակարգի պահպանմանը: Օպտիմալացման արդյունքում այս մարզում մահճակալների թիվը 517-ից կկրճատվի մինչև 469, կազատվի 3656 քմ տարածք:
Գործադիրը հաստատեց ՀՀ-ում կիրառվող դեղատոմսերի ձևերը:
ՀՀ ներքին գործերի նախարարության քրեական պատիժների իրականացման վարչության կենտրոնական հիվանդանոցին կից տարածքում տուբերկուլյոզով հիվանդ կալանավորների համար կառուցվող հիվանդանոցը բուժսարքավորումներով ապահովման, կահավորման և անվտանգության կառույցների ու համակարգերի կառուցման նպատակով գործադիրը ՆԳ նախարարությանը հատկացրեց 151,1 մլն դրամ:
Նիստում հավանություն տրվեց «Հիդրոօդերևութաբանական գործունեության մասին» ՀՀ օրենքում փոփոխություններ կատարելու մասին» օրենքի նախագծին, որը սահմանված կարգով կներկայացվի Ազգային Ժողով:
Երկու այլ որոշումներով հաստատվեցին Իրավաբանական անձանց առանձնացված ստորաբաժանումների և հիմնարկների հաշվառման և իրավաբանական անձանց պետական միասնական գրանցամատյանների տեղեկություններից օգտվելու կարգերը: Վերջինով սահմանվում է, որ պետական գրանցամատյանների տեղեկությունները բաց են համընդհանուր ծանոթացման համար: Պետական ռեգիստրի տարածքային ստորաբաժանումը տեղեկություններ է տրամադրում միայն տվյալ տարածքային բաժնում գրանցված սուբյեկտների վերաբերյալ:
Կառավարությունը հավանություն տվեց «Հայջրմուղկոյուղի» և «Ոռոգում» փակ բաժնետիրական ընկերություններին հարկային արտոնություններ սահմանելու մասին» ՀՀ օրենքի նախագծին: Դրանով մասնավորապես նախատեսվում է օրենքն ուժի մեջ մտնելու օրվա դրությամբ հաշվարկված և չվճարված հարկերի վճարման ժամկետը հետաձգել մինչև 2006 թ. հունվարի 1-ը՝ դրանց մարումն իրականացնելով 2006-2009 թթ. ընթացքում:
Գործադիրը հաստատեց «ՀՀ նախնական և միջին մասնագիտական կրթության համակարգի ռացիոնալիզացման ծրագիրը»: Քննարկման ընթացքում կարևորվեց այդ հաստատություններում պետական պատվերի ձևավորման նպատակային մոտեցումը՝ այն համապատասխանեցնելով իրական պահանջարկին: Վարչապետ Անդրանիկ Մարգարյանը, ռացիոնալիզացման ծրագրի շրջանակներում, կարևորեց նաև համակարգի շենքային հնարավորությունների առավել արդյունավետ օգտագործումը: Այս որոշմամբ ՀՀ նախարարություններին, մարզպետներին, Երևանի քաղաքապետին հանձնարարվեց երկամսյա ժամկետում կառավարություն ներկայացնել ազատված շենքերի հետագա օգտագործման և տնօրինման մասին առաջարկություններ:
Նիստում ընդունվեցին «Օդային փոխադրումներին առնչվող արարողակարգերի պարզեցման ազգային կոմիտե ստեղծելու և դրա կազմը հաստատելու, ինչպես նաև «Հայաստանի հանրային ռադիոընկերություն» ՓԲԸ ստեղծելու մասին որոշումներ: Վերջինիս հիմնադիր հանդիսացող պետական կառավարման լիազորված մարմնի իրավասությունները վերապահվեցին Հանրային հեռուստառադիոընկերության խորհրդին:
Մեկ այլ որոշմամբ հաստատվեցին «Հյուսիսային պողոտա և կասկադ» ծրագրերի իրականացման գրասենյակ» պետական հիմնարկի կանոնադրությունը և կառուցվածքը:
Կառավարությունը հավանություն տվեց Ազգային Ժողովի արտահերթ նստաշրջան գումարելու մասին ՀՀ նախագահի հրամանագրի նախագծին: Վերջինով նախատեսվում է հուլիսի 23-ին, ժամը 12:00-ին գումարել ՀՀ Ազգային Ժողովի արտահերթ նստաշրջան:
