հինգշաբթի, 18 մայիսի 2006
ՀՀ վարչապետ Անդրանիկ Մարգարյանն այսօր ՀՀ կրթության և գիտության նախարարության աշխատակազմին է ներկայացրել նորանշանակ նախարար Լևոն Մկրտչյանին:
Վարչապետն ընդգծել է, որ կրթության և գիտության ոլորտում սկսված բարեփոխումները, կառավարության ծրագրի համաձայն, շարունակվելու են, քաղաքականության մեջ կտրուկ փոփոխություններ չեն լինելու և մասնագետները, որոնք անցած տարիներին ակտիվ ներգրավված են եղել բարեփոխումների իրականացման աշխատանքին ու իրենց զգալի ներդրումն ունեն բնագավառում՝ կշարունակեն աշխատել: Նա նշել է, որ Սերգո Երիցյանին աշխատանքից ազատելը պայմանավորված էր քաղաքական դրդապատճառներով և շնորհակալություն է հայտնել համատեղ աշխատանքի համար: Վարչապետը համարել է, որ նորանշանակ նախարարին ներկայացնելու առանձնապես հարկ չկա, քանի որ իբրև նախկին նախարար, Լևոն Մկրտչյանին նախարարությունում գրեթե բոլորը գիտեն, ծանոթ են նրա աշխատաոճին, իսկ նախարարը քաջատեղյակ է բնագավառում իրագործվող քաղաքականությանն ու խնդիրներին: Այդ առումով, դժվարություններ չեն լինի, և Լևոն Մկրտչյանը կշարունակի Սերգո Երիցյանի օրոք սկսված աշխատանքը՝ պահպանելով հաջորդականության սկզբունքն ու հավատարիմ մնալով ավելի վաղ սկսված բարեփոխումների ոգուն ու կառավարության կողմից հաստատված ծրագրերին:
Սերգո Երիցյանը շնորհակալություն է հայտնել հանրապետության նախագահին, վարչապետին և նախարարության աշխատակիցներին՝ իր պաշտոնավարման ընթացքում ցուցաբերած աջակցության և համատեղ աշխատանքի համար՝ ընդգծելով, որ առանց այդ համագործակցության հնարավոր չէր լինի իրականացնել նախարարության առջև դրված խնդիրները: Նա նշել է, որ նախարարության աշխատակազմը, Լևոն Մկրտչյանից հետո, լուրջ փոփոխություններ չի կրել, հիմնական մասնագիտական միջուկը շարունակել է աշխատել նաև իր պաշտոնավարման շրջանում և վստահություն է հայտնել, որ հաջորդականության սկզբունքը նույնկերպ կպահպանի նաև Լևոն Մկրտչյանը: Սերգո Երիցյանը հաջողություններ է մաղթել նորանշանակ նախարարին՝ հույսով, որ նրա գործունեության ընթացքում տրամաբանական ավարտին կհասցվեն սկսված բարեփոխումները:
Շնորհակալություն հայտնելով բարեմաղթանքների համար, Լևոն Մկրտչյանը վստահեցրել է, որ կառավարության աջակցությամբ, նախարարության մասնագետների հետ միասին, կշարունակեն իրագործել կրթական համակարգում ու գիտության բնագավառում իրականացվող կարևորագույն բարեփոխումները:
