հինգշաբթի, 11 մայիսի 2006
Այսօր տեղի է ունեցել «Հազարամյակի մարտահրավերներ» հիմնադրամի հայաստանյան ծրագրի հոգաբարձուների խորհրդի նիստ, որը վարել է խորհրդի նախագահ, ՀՀ վարչապետ Անդրանիկ Մարգարյանը: Նիստին հրավիրված էին նաև հասարակական կազմակերպությունների ներկայացուցիչներ՝ «Հայաստանի անտառներ» ՀԿ-ի տնօրեն Նազելի Վարդանյանը, «Համալսարանական կրթությամբ կանանց միություն» ՀԿ-ի նախագահ Ջեմմա Հասրաթյանը, ««Ասպարեզ» լրագրողների ակումբ» ՀԿ-ի նախագահ Լևոն Բարսեղյանը:
Հոգաբարձուների խորհուրդն ի գիտություն է ընդունել նախորդ նիստում ընդունված որոշումների կատարման վերաբերյալ «Հազարամյակի մարտահրավերներ» հիմնադրամի հայաստանյան ծրագրի աշխատանքային խմբի ղեկավար՝ հանձնաժողովի նախագահ, ՀՀ ֆինանսների և էկոնոմիկայի նախարարի տեղակալ Դավիթ Ավետիսյանի ներկայացրած տեղեկատվությունը:
Խորհուրդը քննարկել և հաստատել է նաև «Հազարամյակի մարտահրավերներ» հիմնադրամի հայաստանյան ծրագրի ֆինանսական գործակալի ընտրության նպատակով հայտարարված մրցույթի արդյունքում ստացված տեխնիկական առաջարկների գնահատման արդյունքները: Զեկուցվել է, որ նախաորակավորման հանձնաժողովը կատարել է գնահատում՝ համաձայն «Հազարամյակի մարտահրավերներ» կորպորացիայի կողմից տրամադրված նախաորակավորման չափանիշների: Արդյունքում՝ մրցութային ցանկում ընդգրկվել է թվով երեք կազմակերպություն: Դրանցից մեկը հավաքած միավորներով չի հաղթահարել որակավորման նվազագույն շեմը: Մնացած երկու կազմակերպությունների նախաորակավորման արդյունքները հոգաբարձունների խորհուրդը հաստատել է: Այն այնուհետու կներկայացվի «Հազարամյակի մարտահրավերներ» կորպորացիայի հավանությանը: Հիշյալ կազմակերպությունների ֆինանսական առաջարկները բացելուց և գնահատելուց հետո միայն կհայտարարվի հաղթող ընկերությունը:
Խորհրդի այսօրվա նիտում քննարկվել են նաև կազմակերպչական այլ հարցեր:
