երեքշաբթի, 9 մայիսի 2006
ՀՀ վարչապետ Անդրանիկ Մարգարյանի շնորհավորական ուղերձը մայիսի 9-ի՝ Հաղթանակի և խաղաղության տոնի առթիվ
Սիրելի հայրենակիցներ,
Հայրենական պատերազմի հարգելի վետերաններ, արցախյան ազատամարտի մասնակիցներ
Ջերմորեն շնորհավորում եմ ձեզ` Հաղթանակի և խաղաղության տոնի առթիվ: Այն ձեռք է բերվել ձեր բոլորիդ անձնվիրության ու սխրանքի, բազմաթիվ զրկանքների ու դժվարությունների դիմակայելու և մեր շատ ու շատ փառապանծ հերոսների կյանքի գնով:
Հայրենական մեծ պատերազմում ֆաշիզմի դեմ տարած հաղթանակը և Երկրորդ համաշխարհային պատերազմի ավարտը մեծագույն իրադարձություն էր ամբողջ աշխարհի համար: Ինչպես այդ ժամանակ հեռավոր ռազմաճակատներում, այնպես էլ մեր նորօրյա պատմության ընթացքում արցախյան ազատամարտի տարիներին, հայ ժողովուրդը թշնամուց պաշտպանում էր իր տունն ու հայրենիքը, խաղաղ ու ստեղծարար աշխատանքով ապրելու և արարելու իր իրավունքը: Մայիսյան հաղթանակների այդ հերոսական էջերում ամփոփված են մեր ժողովրդի ազատատենչ և անկոտրում ոգու արտահայտության բազմաթիվ դրվագներ: Հավերժ փառք և խոնարհում` հայրենիքի փրկության համար իրենց կյանքը զոհաբերած նվիրյալների հիշատակին:
Այսօր էլ, երբ ողջ մարդկությունը կանգնած է քաղաքակիրթ աշխարհին սպառնացող նոր մարտահրավերների՝ ահաբեկչության, պատերազմների, ազգային ու ռասայական խտրականության, ցեղասպանության, ֆաշիզմի նոր դրսևորումների վտանգի առջև, երբ ամեն օր այս ամենի հետևանքով աշխարհում դեռևս հարյուրավոր մարդիկ են զոհվում, ծայրահեղական ու հակամարդկային այդ դրսևորումների դեմ կրկին միասնաբար պայքարելու` Երկրորդ աշխարհամարտի գլխավոր դասը հրատապ է ու արդիական:
Այս տարի մենք նշում ենք մեր պետության անկախության հռչակման 15-ամյակը: Մեր ժողովրդի համար այնքան թանկ ու մեծ զոհաբերությունների գնով ձեռք բերված անկախությունը պահպանելը, մեր պետականության հիմքերը շարունակաբար ամրացնելն ու պետությունը հզորացնելը մեզանից յուրաքանչյուրի ամենօրյա նվիրումն է պահանջում:
Հաղթանակի ու խաղաղության այս գեղեցիկ օրը տոնական տրամադրություն, առողջություն և հարատև խաղաղություն եմ ցանկանում բոլորիդ:
