չորեքշաբթի, 20 հունիսի 2001
Այսօր ՀՀ վարչապետ Անդրանիկ Մարգարյանն ընդունեց ՀՀ-ում Արգենտինայի Հանրապետության նորանշանակ դեսպան Խուան Կառլոս Սանչես Առնաուին:
Վարչապետը շնորհավորեց դեսպանին Հայաստանի Հանրապետության նախագահին հավատարմագրերն հանձնելու կապակցությամբ և հույս հայտնեց, որ նրա նշանակումը կնպաստի երկու երկրների համագործակցության առավել խորացմանը: Ըստ Անդրանիկ Մարգարյանի, այսօր ստեղծված են բոլոր պայմանները Հայաստանի և Արգենտինայի միջև գոյություն ունեցող ավանդական բարեկամական հարաբերությունները, գիտական ու մշակութային կապերը նաև ավելի գործնական՝ առևտրատնտեսական բնագավառում զարգացնելու համար: Այս տեսակետից հեռանկրային են հատկապես էներգետիկայի, գյուղմթերքների արտադրության, գիտական հետազոտությունների և այլ ոլորտները: Նշված ուղղություններով համագործակցության խթանման համար վարչապետը կարևորեց հայ-արգենտինյան միջկառավարական հանձնաժողովի ստեղծումը, որի նախապատրաստական աշխատանաքներն արդեն իսկ սկսված են:
Դեսպան Խուան Առնաուն շնորհակալություն հայտնեց ՀՀ վարչապետին ջերմ ընդունելության համար և հավաստիացրեց, որ Արգենտինայի Հանրապետության կառավարության տեսակետը երկու երկրների հետագա համագործակցության զարգացման խնդիրների վերաբերյալ համընկնում է հայկական կողմի ըմբռնումներին: Դեսպանը նշեց, որ իր երկրում առկա է այն իրավական հիմքը, որի վրա կարող է զարգանալ Հայաստանի հետ առևտրատնտեսական փոխշահավետ համագործակցությունը: Ընդգծելով Արգենտինայի հայկական համայնքի զգալի դերը երկրի տնտեսական, գիտական-մշակութային կյանքում, դիվանագետը հույս հայտնեց, որ համայնքի գոյությունը նույնպես կարող է նպաստել երկու երկրների միջև բազմակողմանի համագործակցության զարգացմանը:
