հինգշաբթի, 8 դեկտեմբերի 2005
Այսօր՝ Եգիպտոսում պաշտոնական այցի վերջին օրը, ՀՀ վարչապետ Անդրանիկ Մարգարյանը և նրա գլխավորած պատվիրակությունը Կահիրեից մեկնել են Ալեքսանդրիա, որտեղ կայացել է ՀՀ վարչապետի հանդիպումը Ալեքսանդրիայի նահանգապետ Մուհամմադ Աբդել Սալամ Մահգուրի հետ:
Հայաստանի կառավարության ղեկավարն այցելել է նաև Ալեքսանդրիայի նշանավոր գրադարան: Վարչապետը, Մատենադարանի տնօրեն Սեն Արևշատյանի հետ, գրադարանին է նվիրել Էջմիածնի Ավետարանի ֆոտո-ֆաքսիմիլ տարբերակը, որը հայերեն հին եզակի մագաղաթյա ձեռագրերից մեկն է՝ գրված 989 թվականին և մինչ օրս եղել է Մատենադարանի հավաքածուում: Այժմ այն ցուցադրվելու է 2006թ. փետրվարին Ալեքսանդրիայի գրադարանում բացվելիք Մ.Մաշտոցի անվան հին ձեռագրերի ինստիտուտի նմուշների ցուցահանդեսում և, ապա որպես նվեր մնալու է Ալեքսանդրիայի գրադարանում՝ հիմք հանդիսանալով այդ գրադարանի հայերեն գրքերի ֆոնդի համար:
Ուշ երեկոյան ՀՀ վարչապետի գլխավորած պատվիրակությունը կվերադառնա Երևան:
