չորեքշաբթի, 7 դեկտեմբերի 2005
Այսօր՝ պաշտոնական այցի երրորդ օրը, ՀՀ վարչապետ Անդրանիկ Մարգարյանը մեկնել է ԵԱՀ նախագահի նստավայր, որտեղ հանդիպում է ունեցել Եգիպտոսի նախագահ Հոսնի Մուբարաքի հետ:
Հանդիպման սկզբում Անդրանիկ Մարգարյանը Եգիպտոսի նախագահին է փոխանցել ՀՀ նախագահի ջերմ ողջույններն ու հատուկ ուղերձը:
Հայաստանի կառավարության ղեկավարը շնորհավորել է Հոսնի Մուբարաքին՝ այս տարվա սեպտեմբերին կայացած նախագահական ընտրություններում 5-րդ անգամ վերընտրվելու կապակցությամբ: Նախագահի հետ հանդիպմանը ևս Անդրանիկ Մարգարյանը բարձր է գնահատել բազմաթեկնածու ընտրությունների անցկացումը Եգիպտոսում՝ այն որակելով երկրում անցկացվող ժողովրդավարական բարեփոխումների շարունակական ընթացքը ապահովող գործոն: ՀՀ վարչապետն ընդգծել է Եգիպտոսի նախագահ Հոսնի Մուբարաքի կողմից նախաձեռնված պատմական բարեփոխումների իրականացման կարևորությունը և այդ կապակցությամբ հաջողություններ է մաղթել Եգիպտոսի բարեկամ ժողովրդին ու նրա ղեկավարությանը: Վարչապետը հույս է հայտնել, որ Եգիպտոսի նոր խորհրդարանի ձևավորումից հետո, ակտիվացում կապրեն նաև հայ-եգիպտական միջխորհրդարանական կապերը: Նա կարևորել է Եգիպտոսի դերն ու միջնորդական ջանքերը իսրայելա-պաղեստինյան հակամարտության խաղաղ կարգավորման գործընթացում: Անդրանիկ Մարգարյանը նշել է, որ Հայաստանը՝ ելնելով տարածաշրջանային անվտանգության նկատառումներից, մեծապես շահագրգռված է նաև Իրաքում իրավիճակի շուտափույթ կայունացմամբ:
Հանդիպման ընթացքում քննարկվել են նաև երկու երկրների հարբերությունները հարևան երկրների հետ, ինչպես նաև երկուստեք հետաքրքրություն ներկայացնող մի շարք տարածաշրջանային հարցեր:Անդրանիկ Մարգարյանը նշել է, որ Հայաստանը բազմիցս արտահայտվել է Թուրքիայի հետ առանց նախապայմանների հարաբերություններ հաստատելու իր պատրաստակամությունը, մինչդեռ թուրքական կողմը հարաբերությունների հաստատումը պայմանավորում է ղարաբաղյան հակամարտության կարգավորմամբ և Ցեղասպանության միջազգային ճանաչման գործընթացով: Նա անընդունելի է համարել Ադրբեջանի կողմից իսլամական համերաշխության շահարկումն ու ղարաբաղյան հակամարտությանը կրոնական բնույթ հաղորդելու փորձերը, որոնք, վարչապետի համոզմամբ, չեն համապատասխանում Հայաստանի և արաբական երկրների միջև գոյություն ունեցող ջերմ բարեկամական հարաբերությունների ոգուն:
Վարչապետ Անդրանիկ Մարգարյանը և նախագահ Հոսնի Մուբարաքը նշել են, որ երկու երկրների միջև քաղաքական հարաբերությունների բարձր մակարդակը անհրաժեշտ է ամրագրել տնտեսական հարաբերությունների զարգացմամբ: Ըստ նրանց, հաջողված ծրագրերը լուրջ ազդակ կծառայեն առևտրատնտեսական հարաբերությունների հետագա ակտիվացման համար:
Հանդիպմանը երկու երկրների վարչապետները Եգիպտոսի նախագահին ներկայացրել են նաև Հայ-եգիպտական միջկառավարական համատեղ հանձնաժողովի 4-րդ նիստի աշխատանքների արդյունքները՝ դրանք գնահատելով արդյունավետ և գործնական:
ԵԱՀ նախագահի հետ հանդիպումից հետո, վարչապետ Անդրանիկ Մարգարյանը այցելել է Եգիպտոսի Հայոց Առաջնորդարան, որտեղ մասնակցել է 1988թ. երկրաշարժի զոհերի հիշատակին նվիրված հոգեհանգստյան արարողությանը: Առաջնորդարանում կայացել է նաև վարչապետի հանդիպումը եգիպտահայ համայնքի ներկայացուցիչների հետ:
Այնուհետև ՀՀ պատվիրակությունն այցելել է պատմական Լուքսորի նահանգ, որտեղ ՀՀ վարչապետին դիմավորել և ողջունել է Լուքսորի նահանգապետ Սամիր Ֆարագը: Անդրանիկ Մարգարյանը և ՀՀ պատվիրակության անդամները ծանոթացել են Լուքսորի պատմամշակութային արժեքներին՝ այդ թվում նշանավոր Կարնակի տաճարին և տեսարժան այլ վայրերին:
Երեկոյան Անդրանիկ Մարգարյանը և ՀՀ պատվիրակության անդամները մասնակցել են Լուքսորի նահանգապետի անունից ՀՀ վարչապետի պատվին տրված ընթրիքին:
Վաղը ՀՀ վարչապետի գլխավորած պատվիրակությունը կմեկնի Ալեքսանդրիա, որտեղ նախատեսվում է Անդրանիկ Մարգարյանի հանդիպումը Ալեքսանդրիայի նահանգապետ Մոհամմադ Աբդել Սալամ Մահգուրի հետ:
