ուրբաթ, 2 դեկտեմբերի 2005
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 9 բարեգործական ծրագիր: Մասնավորապես, քննարկվել և հաստատվել են Մայր Աթոռ Սուրբ Էջմիածնի կողմից իրականացվող Գյումրու Սուրբ Աստվածածին (յոթ վերք) եկեղեցու կոնստրուկցիաների ուժեղացման և վերանորոգման, Մայր Աթոռ Սուրբ Էջմիածնի եկեղեցուն հարող տարածքի ասֆալտապատման, «Հայ եկեղեցու պատմության» առարկայի 9-րդ, 10-րդ դասարանցիների համար դասագրքերի հրատարակման և «Նշանավոր ճեմարանցիներ» գրքի հրատարակման ծրագրերը, ինչպես նաև «Հայաստան» համահայկական հիմնադրամի կողմից Օլիմպիական հերթափոխի ՊՈԱԿ մարզադպրոցի համար արևային ջրատաքացուցիչ համակարգի պատրաստման և տեղադրման աշխատանքների իրականացման ծրագիրը, ՄԱԿ-ի փախստականների հարցերով գերագույն հանձնակատարի հայաստանյան գրասենյակի ֆինանսավորմամբ Հայաստանի Հանրապետության կառավարությանն առընթեր միգրացիայի և փախստականների վարչության կողմից Երևանի Նոր Նորքի ուսանողական ավանի հանրակացարանային առաջին մասնաշենքում «Հատուկ կացարան»- ում ապաստան գտած 12 փախստականի կարգավրճակ հայցող ընտանիքների կոմունալ պայմանների բարելավման ծրագիրը:
Նիստում հաստատվել են նաև Գիտության և առաջատար տեխնոլոգիաների ազգային հիմնադրամի կողմից «Երևանի պետական համալսարանում իրականացվող «Օդով և ջրով հովացնող ժամանակակից ՊՓՄ վառելիքային բջիջների մշակում» ծրագիրը, Մեծ Բրիտանիայի միջազգային զարգացման նախարարության երևանյան գրասենյակի կողմից իրականացվող «Աջակցություն Հայաստանի Հանրապետության կառավարությանը դոնորների գործողությունների համակարգման գործընթացում» ծրագիրը:
Հանձնաժողովի հաստատմանն են արժանացել նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
