շաբաթ, 12 նոյեմբերի 2005
ՀՀ վարչապետ Անդրանիկ Մարգարյանն այսօր ընդունել է տարածաշրջանային պաշտոնական այցի շրջանակներում Հայաստան ժամանած «ԱլկաՏել» ընկերության պատվիրակությանը՝ ընկերության նախագահ և գլխավոր գործադիր տնօրեն Սերժ Չուրուքի գլխավորությամբ: Վարչապետը նախ շնորհավորել է պարոն Չուրուքին՝ Հայաստանի գիտությունների ազգային ակադեմիայի պատվավոր դոկտորի կոչում ստանալու կապակցությամբ:
Բարձր գնահատելով «ԱլկաՏել»-ի հետ համագործակցությունը, Անդրանիկ Մարգարյանը նշել է, որ տեղեկատվական տեխնոլոգիաների ոլորտում հեղինակավոր այդ ընկերության ընդգրկվածությունը ինչպես ՀՀ վարչապետին կից ՏՏ զարգացմանն աջակցող խորհրդում, այնպես էլ «Ձեռնարկությունների ինկուբատոր» հիմնադրամի հոգաբարձուների և փորձագետների խորհուրդներում, բարենպաստ հիմք է երկկողմ փոխշահավետ գործակցության զարգացման համար:
Նա հավաստիացրել է, որ տեղեկատվական հասարակությանը նվիրված թունիսյան գագաթաժողովի շրջանակներում անպայման կայցելի նաև «ԱլկաՏել»-ի տաղավար՝ ընկերության նոր ձեռքբերումներին ծանոթանալու նպատակով, չնայած վերջերս Հայաստանում կազմակերպված ՏՏ ոլորտի ցուցահանդեսում ևս առիթ ունեցել է ընկերության ներկայացուցիչների հետ հանդիպելու և հետագա համագործակցության շուրջ որոշակի հարցեր քննարկելու: Ըստ ՀՀ կառավարության ղեկավարի, ՏՏ ոլորտի աշխարհահռչակ այս ընկերության հետ մեր երկրում երկարատև և հեռանկարային ծրագրեր իրականացնելու լավ հնարավորություններ կան, որին, անշուշտ, մեծ խթան կարող է հանդիսանալ ընկերության պատվիրակության ներկայիս այցը Հայաստան: Ընդգծելով, որ ՀՀ կառավարությունը տեղեկատվական տեխնոլոգիաները հայտարարել է տնտեսության գերակայություններից մեկը և արդեն իսկ ոլորտում նկատելի ակտիվացում ու առաջընթաց կա, վարչապետը կարևորել է հատկապես գիտահետազոտական, ծրագրային աշխատանքների ուղղությամբ համագործակցության զարգացումը, բարձր մտավոր ներուժի վրա հիմնված գիտատար տնտեսության ստեղծումը և նորարարական տեխնոլոգիաների լայնորեն ներդրումը ամենատարբեր բնագավառներում: Այս առումով, «ԱլկաՏել»-ի ներկայացուցիչներին հետ նա քննարկել է Հայաստանում ուսումնական և գիտահետազոտական տարածաշրջանային լաբորատորիա ստեղծելու գաղափարը, որը հավանության է արժանացել զրուցակիցների կողմից: Անդրանիկ Մարգարյանն ընդգծել է, որ ՀՀ կառավարությունը նախատեսում է մշակել նաև այսօրվա իրողություններին համապատասխան «Տեղեկատվական հասարակության» կայացման ազգային ռազմավարություն:
Հանդիպմանը, «ԱլկաՏել» ընկերության նախագահ և գլխավոր գործադիր տնօրեն Սերժ Չուրուքը, պատվիրակության անդամ՝ Ֆրանսիայի խորհրդարանի պատգամավոր Պատրիկ Դևեջյանը նշելով, որ իրենց նախորդ այցից հետո Հայաստանում ակնառու են դրական փոփոխությունները, ինչն, ըստ նրանց, ճիշտ կառավարման մասին է վկայում, այդ կապակցությամբ շնորհավորել են ՀՀ վարչապետին: Պարոն Չուրուքը համառոտ անդրադարձել է ՏՏ ոլորտում աշխարհի առաջատար ընկերություններից մեկի՝ «ԱլկաՏել»-ի գործունեությանն ու ծրագրերին, միաժամանակ, հայտնել իրենց ցանկությունն ու պատրաստակամությունը՝ գիտահետազոտական, տնտեսության մեջ նորարարական տեխնոլոգիաների ներդրման որոշակի ծրագրերի շուրջ համագործակցություն սկսելու հարցում՝ ընդգծելով, որ Հայաստանում, անկասկած, տեղեկատվական տեխնոլոգիաները պետք է գերակայություն համարվեն, ինչը հատկապես փոքր ու միջին ձեռնարկատիրության ոլորտում լուրջ հաջողությունների երաշխիք կարող է դառնալ:
ՀՀ վարչապետը, շնորհակալություն հայտնելով մեր երկրում գործունություն ծավալելու՝ «ԱլկաՏել»-ի նման պատրաստակամության և շահագրգռության համար, նշել է, որ Հայաստանը փոխշահավետ գործակցության այդ հնարավորությունից կփորձի անպայման օգտվել:
