երկուշաբթի, 31 հոկտեմբերի 2005
Այսօր կառավարությունում ՀՀ տարածքային կառավարման նախարար Հովիկ Աբրահամյանն ընդունել է Շարժայի բանկի կառավարիչ Վարուժան Ներգիզյանին:
Կարևորելով Արաբական Էմիրությունների հետ մեր երկրի հարաբերությունների զարգացումը, Հովիկ Աբրահամյանը նշել է, որ այս տարվա սեպտեմբերին Շարժայի էմիր ալ-Կասիմիի այցը Հայաստան և այցի շրջանակներում Շարժայի մշակույթի օրերի անցկացումը նպաստեցին փոխշահավետ համագործակցության խթանմանը: Ըստ նրա, պարոն Վարուժան Ներգիզյանի ներկա այցը առաջին գործնական քայլն է, բարձր մակարդակով ձեռք բերված պայմանավորվածությունների համաձայն, կողմերի միջև տնտեսական համագործակցության, տարբեր ոլորտներում համատեղ ծրագրերի մշակման և իրականացման ուղղությամբ: Զրուցակիցները քննարկել են երկու պետությունների առանձին բնակավայրերի միջև կապերի հաստատման, Տավուշի մարզում մի շարք ծրագրերի, մասնավորապես, Հաղարծնի վերանորոգման, եկեղեցի տանող ճանապարհի վերականգնման և այլ նախագծեր:
Նախարար Հովիկ Աբրահամյանը և Շարժայի բանկի կառավարիչ Վարուժան Ներգիզյանը կարևորել են նաև Արաբական Միացյալ Էմիրությունների հայ համայնքի դերը երկու երկրների միջև համագործակցության հաստատման ու ամրապնդման գործում:
