ուրբաթ, 28 հոկտեմբերի 2005
ՀՀ վարչապետ Անդրանիկ Մարգարյանն այսօր ընդունել է Հայաստանում Հունաստանի նորանշանակ արտակարգ և լիազոր դեսպան, տիկին Պանայոտա Մավրոմիխալիին:
Շնորհավորելով դեսպանին մեր երկրում իր դիվանագիտական առաքելությունն ստանձնելու կապակցությամբ, վարչապետը վստահություն է հայտնել, որ պատմական խոր արմատներ ունեցող հայ-հունական բարեկամական հարաբերությունները այսուհետ ևս նույն հաջողությամբ կզարգանան: Ըստ նրա, այս տարվա նոյեմբերին նախատեսվող ՀՀ նախագահի այցը Հունաստան նույնպես զգալիորեն կնպաստի երկու պետությունների ու ժողովուրդների միջև փոխգործակցության խթանմանն ու բարեկամությանը: Կարևորելով «Եվրոպական հարևանության քաղաքականության» մեջ Հայաստանի ընդգրկումը, Անդրանիկ Մարգարյանը նշել է, որ դա նոր մակարդակի է բարձրացնում մեր երկրի հարաբերությունները ինչպես Եվրամիության, այնպես էլ ԵՄ անդամ պետությունների, այդ թվում՝ Հունաստանի հետ:
Ընդգծելով, որ իր գործունեությունը մեր երկրում սկսում է Հայաստանի համար շատ կարևոր իրադարձության՝ Սահամադրական փոփոխությունների հանրաքվեի նախապատրաստական շրջանում, տիկին Պանայոտա Մավրոմիխալին հույս է հայտնել, որ ինչպես այդ, այնպես էլ եվրաինտեգրմանն ուղղված մյուս գործընթացները կնպաստեն Հայաստանի իրական առաջընթացին:
Զրույցի ընթացքում կողմերը կարևորել են Հայաստանի և Հունաստանի համագործակցության զարգացումը պաշտպանության, ազգային անվտանգության բնագավառներում:
Վարչապետ Անդրանիկ Մարգարյանը և դեսպան Պանայոտա Մավրոմիխալին նշել են, որ ի տարբերություն քաղաքական երկխոսության դինամիկ զարգացմանը, առևտրատնտեսական հարաբերությունները չեն արտացոլում երկու երկրների միջև փոխգործակցության առկա ներուժը: Գործընթացի ակտիվացման, ապրանքաշրջանառության ավելացման նպատակով, նրանք ընդգծել են Հայ-հունական տնտեսական, արդյունաբերական և գիտատեխնիկական համագործակցության միջկառավարական հանձնաժողովի հերթական նիստի գումարման անհրաժեշտությունը 2006թ. ընթացքում: Զրուցակիցները փոխգործակցության համար առավել հնարավոր ու հեռանկարային են համարել, մասնավորապես, գյուղատնտեսության, առողջապահության, գիտության, կրթության, զբոսաշրջության ոլորտները:
Հանդիպման ավարտին վարչապետը հաջողություն է մաղթել դեսպանին՝ մեր երկրում իր դիվանագիտական առաքելության իրականացման գործում և կառավարության կողմից պատրաստակամություն հայտնել, հարկ եղած դեպքում, հնարավորինս աջակցել դեսպանին:
