ուրբաթ, 9 սեպտեմբերի 2005
Այսօր տեղի է ունեցել ՀՀ կառավարության բարեգործական ծրագրերի համակարգման հանձնաժողովի հերթական նիստը, որը վարել է հանձնաժողովի նախագահ Ս. Տեր-Սիմոնյանը:
Հանձնաժողովը քննարկել է 8 բարեգործական ծրագիր: Մասնավորապես, քննարկվել և հաստատվել են «Հայաստան» համահայկական հիմնադրամի կողմից Երևան քաղաքի ըմբշամարտի մարզադպրոցի սանհանգույցների վերանորոգման աշխատանքների իրականացման, ՀՀ Ստեփանավան քաղաքի Ձախափնյա թաղամասի 4-րդ միկրոշրջանի մի շարք փողոցների և Սուրբ նշան փողոցի կոյուղագծերի վերակառուցման ծրագրերը, Գիտության և առաջատար տեխնոլոգիաների ազգային հիմնադրամի կողմից Հայաստանի ՀՀ գիտությունների ազգային ակադեմիայի օրգանական քիմիայի ինստիտուտում իրականացվող ծրագիրը:
«Հայ օգնության միություն» բարեգործական հասարակական կազմակերպության կողմից իրականացվող «Կրթական հաստատությունների վերանորոգում» ծրագրի նպատակն է նպաստավոր պայմաններ ստեղծել երեխաների կրթության համար, իսկ «ԱՌԴԱ» բարեգործական հիմնադրամի կողմից իրականացվող «Բարեկեցիկ մանկություն-18» ծրագրով նախատեսվում է Գյումրի քաղաքի թիվ 18 մանկապարտեզի խոհանոցի և մթերքի պահեստի մասնակի վերանորոգում, ինչպես նաև մանկապարտեզի սաների կենցաղային պայմանների բարելավում, սննդի, հագուստի, խաղալիքների տրամադրում:
«Բժիշկներ առանց սահմանների-Բելգիա» կազմակերպության հայաստանյան մասնաճյուղի կողմից կիրականացվի «ՍՃՓՀ/ՄԻԱՎ հարուցման վնասի նվազեցում Հայաստանի հյուսիսային շրջանում», իսկ «Ֆրանսիայի բողոքական եկեղեցու և Հայաստանի միջև համերաշխություն» բարեգործական կազմակերպության Գյումրիի մասնաճյուղի կողմից՝ «Գյումրիի «Սամարիտեր» հիվանդանոցի դիալեզի բաժնի, Մանկական ինֆեկցիոն հիվանդանոցի և Հակատուբերկուլոզային դիսպանսերի վերանորոգում» ծրագրերը:
Նիստում քննարկվել և հաստատվել են նաև նախկինում հաստատված ծրագրերի շրջանակներում իրականացվող հարակից գործարքներ և տարբեր կազմակերպությունների հասցեներով ուղարկված բարեգործական բեռների ներմուծման ծրագրեր:
