հինգշաբթի, 21 հուլիսի 2005
ՀՀ վարչապետ Անդրանիկ Մարգարյանն այսօր հանդիպում է ունեցել Արժույթի միջազգային հիմնադրամի կառավարիչ տնօրենի տեղակալ Ագուստին Կարստենսի և նրա գլխավորած պատվիրակության հետ: Վարչապետը, հիմնադրամի հետ կառավարության համագործակցությունը արդյունավետ համարելով և ընդգծելով, որ ի նպաստ մեր երկրի տնտեսության ու բարեփոխումների ընթացող համատեղ աշխատանքը լիրաժեք փոխըմբռնման մթնոլորտում է, կառավարության ղեկավարը շնորհակալություն է հայտնել Արժույթի միջազգային հիմնադրամին՝ կառավարության Աղքատության հաղթահարման ռազմավարական ծրագրի մշակմանը, այնուհետ՝ դրա իրագործմանն ուղղված ջանքերին աջակցելու համար: Նա կարևորել է ԱՀՌԾ-ի պատշաճ կատարումը, որպեսզի այն, իրոք, որակական ազդեցություն ունենա երկրի տնտեսության և ժողովրդի կենսամակարդակի բարձրացման վրա: Այս համատեքստում զրուցակիցներն անդրադարձել են մեր երկրի մակրոտնտեսական ցուցանիշներին, առկա խնդիրներին և դրանց լուծման հնարավոր ուղիներին: Անդրանիկ Մարգարյանը նշել է, որ մակրոտնտեսական իրավիճակը համապատասխան ծրագրվածի է, նույնիսկ՝ արձանագրված առաջընթացի պայմաններում, կառավարությունը առաջիկայում ստիպված կլինի վերանայել ծրագրված ցուցանիշները: Պարոն Կարստենսը հիմնադրամի կողմից պատրաստակամություն է հայտնել, հարկ եղած դեպքում, այդ հարցում մասնագիտական աջակցություն ցուցաբերել կառավարությանը: Նա նշել է, թե ուրախ է արձանագրել, որ Հայաստանը զգալի տեղաշարժեր է արձանագրել տնտեսության մեջ և գնահատում է իշխանությունների ջանքերը ԱՄՀ-ի՝ ինչպես նախորդ, այնպես էլ ս.թ. մայիսին հիմնադրամի խորհրդի կողմից հաստատված հայաստանյան նոր ծրագրի լավ կատարողականի ուղղությամբ:
ԱՄՀ կառավարիչ տնօրենի տեղակալը նաև ողջունել է հարկային և մաքսային ոլորտներում բարեփոխումներ իրականացնելու՝ կառավարության նախաձեռնությունը, որն, ըստ նրա, կարևոր է տնտեսության մեջ թափանցիկության ապահովման, կառավարման արդյունավետության և ներդրումների միջավայրի բարելավման համար:
Հանդիպման ընթացքում անդրադարձ է եղել մեր երկրի դրամավարկային և հարկային քաղաքականությանը, ազգային արժույթի արժևորման, ֆինանսական հատվածի զարգացման հարցերին ևս: Ագուստին Կարստենսը նշել է, թե Հայաստանը, ըստ իրենց դիտարկումների, բավականին հաջող է արձագանքել փոխարժեքի հետ կապված խնդիրներին և ազգային արժույթի արժևորման հիմնախնդիրը պայմանավորելով նաև դեպի երկիր ֆինանսական միջոցների հոսքի ավելացմամբ, անհրաժեշտ է համարել, այնուամենայնիվ, դրա հետևանքների մեղմման ուղղությամբ արդյունավետ քայլերի իրականացումը: Այս գործում ևս նա առաջարկել է ԱՄՀ-ի խորհրդատվական աջակցությունը, ինչը շնորհակալությամբ է ընդունվել կառավարության ղեկավարի կողմից: Վարչապետը և ԱՄՀ կառավարիչ տնօրենի տեղակալը քննարկել են հետագա համագործակցության ոլորտների հետ կապված այլ հարցեր ևս: