երկուշաբթի, 13 հունիսի 2005
Այսօր կառավարությունում ՀՀ տարածքային կառավարման նախարար Հովիկ Աբրահամյանն ընդունել է Համաշխարհային բանկի փոխնախագահ Շիգեո Կացուին:
Քննարկվել են Հայաստանում ՀԲ-ի կողմից իրականացվող, մասնավորապես ջրամատակարարման, ոռոգման ոլորտի ծրագրերի ընթացքի և համագործակցության հեռանկարների հետ կապված հարցեր: Ներկայացնելով ոռոգման և խմելու ջրերի ոլորտներում իրականացվող բարեփոխումները, Հովիկ Աբրահամյանը գոհունակություն է հայտնել ընդհանուր առմամբ դրանց հաջող ընթացքից, ընդգծելով, որ նման ծրագրերի շարունակումն իր դրական ազդեցությունը կունենա նաև Հայաստանի տնտեսական աճի ներկա ցուցանիշների պահպանման, ժողովրդի կենսամակարդակի բարձրացման վրա: Միաժամանակ, նախարարն անդրադարձել է ընթացիկ որոշ դժվարությունների ու խնդիրների, հույս հայտնելով, որ ՀԲ-ի հետ համատեղ ջանքերով դրանք ևս հնարավոր կլինի արագորեն կարգավորել:
Ընդգծելով, որ Համաշխարհային բանկում որոշակի վստահություն է ձևավորվել Հայաստանում իրականացվող ծրագրերի հաջող ընթացքի վերաբերյալ, Շիգեո Կացուն նշել է, որ բարձրացված հարցերը մոտ ժամանակներս հանգամանորեն կքննարկվեն և իրենց լուծումները կստանան: Նա առաջարկել է քննարկել նաև ջրամատակարարում-ջրահեռացում ամբողջ համակարգն ընդգրկող նոր ծրագրի մշակման և իրականացման հնարավորությունը: Ողջունելով Ասիական զարգացման բանկի հետ Հայաստանի համագործակցության հաստատումը, Շիգեո Կացուն և հանդիպմանը մասնակցող ՀԲ-ի հայաստանյան գրասենյակի ղեկավար Ռոջեր Ռոբինսոնը կարևորել են ինչպես Համաշխարհային բանկի կողմից Հայաստանում իրականացվող ծրագրերի, այնպես էլ Ասիական զարգացման բանկի, «Հազարամյակի մարտահրավերներ» կորպորացիայի և այլ միջազգային կառույցների կողմից առաջիկայում ակնկալվող աջակցության ծրագրերի փոխհամաձայնեցված իրագործումը:
