հինգշաբթի, 5 մայիսի 2005
ՀՀ վարչապետ Անդրանիկ Մարգարյանն այսօր ընդունել է Հազարամյակի մարտահրավերների հիմնադրամի երկրի տնօրեն Ալեքս Ռասինին և նրա գլխավորած պատվիրակությանը: Պատվիրակությունը մեր երկրում է գտնվում Հիմնադրամի շրջանակներում օժանդակության տրամադրման համար Հայաստանի ներկայացրած հայտի կապակցությամբ:
Հանդիպման սկզբում Ալեքս Ռասինը՝ Հազարամյակի մարտահրավերների հիմնադրամի նախագահ Փոլ Էփըլգարդի անունից շնորհակալություն է հայտնել վարչապետին և կառավարությանը՝ հայաստանյան ծրագրի արագ և հստակ մշակման համար: Վարչապետ Անդրանիկ Մարգարյանը, ներկայացնելով ծրագրի մշակման ընթացքը, իր գլխավորած հոգաբարձուների խորհրդի, աշխատանքային ու խորհրդատվական խմբերի գործունեությունը, հիմնական ուղղությունների ընտրության հարցում որդեգրված մոտեցումներն ու սկզբունքները, մեկ անգամ ևս նշել է, որ ծրագիրը համահունչ է նաև ՀՀ կառավարության կողմից ընդունված Աղքատության հաղթահարման ռազմավարական ծրագրի նպատակներին ու խնդիրներին: Ալեքս Ռասինը, իր հերթին, վարչապետին ծանոթացրել է հիմնադրամի գնահատման մեխանիզմին և հայաստանյան ծրագրի ընդունման, համաձայնագրի ստորագրման դեպքում նախատեսվող հետագա անելիքներին: Այդ ընթացքում նա կարևորել է, մասնավորապես, կարճ ժամկետում նոր երկկողմ աշխատանքային խմբերի ստեղծումը՝ անհրաժեշտության դեպքում հայաստանյան ծրագրի լրամշակման և հիմնադրամի ծրագրերին ու խնդիրներին առավելագույնս համապատասխանեցման, իր խոսքերով՝ համապարփակ ծրագրի ստեղծման և իրականացման նպատակով:
Վարչապետ Անդրանիկ Մարգարյանը նշել է, որ Հայաստանի կառավարությունը մոտ ժամկետում կներկայացնի իր աշխատանքային խմբի կազմը և եթե հայաստանը ընդգրկվի հիմնադրամի կողմից ֆինանսական օժանդակություն ստացող առաջին երկրների շարքում, ապա պատրաստ է կազմելու նաև հստակ ժամանակացույց՝ նախատեսված ծրագրերը արագ և արդյունավետորեն կյանքի կոչելու համար:
