Հայաստանի Հանրապետության Կառավարություն

Այսօր փոխվարչապետ Տիգրան Խաչատրյանի գլխավորությամբ տեղի է ունեցել Ղարաբաղի հայ փախստականների կենսակայունացման և զբաղվածության աջակցության շրջանակի վերաբերյալ զարգացման գործընկերների մասնակցությամբ հերթական հանդիպումը: Հանդիպմանը մասնակցել են դիվանագիտական ներկայացուցչությունների և միջազգային կազմակերպությունների շուրջ հինգ տասնյակ ղեկավարներ և ներկայացուցիչներ:

Ողջունելով ներկաներին՝ փոխվարչապետը անդրադարձել է բռնի տեղահանված հայերի սոցիալ-տնտեսական ներառման ընթացիկ իրավիճակին՝ բարձր գնահատելով գործընկերների հետ այս ուղղությամբ ձևավորված համագործակցությունը: Անդրադառնալով առաջիկա տարիներին նախատեսվող առաջնահերթ անելիքներին՝ Տիգրան Խաչատրյանը հույս է հայտնել, որ կենսակայունացման և զբաղվածության արդյունավետ հնարավորությունների և հավելյալ խթանների տրամադրման ուղղությամբ ձևավորված արդյունավետ փոխգործակցությունը կլինի շարունակական:

Հանդիպման ընթացքում ներկայացվել է Կառավարության առաջնորդությամբ և ՄԱԿ-ի մշտական համակարգողի գրասենյակի, ՄԱԿ-ի զարգացման ծրագրի և Փախստականների հարցերով գերագույն հանձնակատարի գրասենյակի աջակցությամբ մշակված՝ փախստականների և նրանց հյուրընկալող համայնքների կենսակայունացման շրջանակային փաստաթուղթը, ինչպես նաև տրվել է դրա իրականացման ուղղությամբ միջազգային զարգացման և հումանիտար գործընկերների հետ համակարգման շրջանակի մեկնարկը:

Հանդիպմանը հատուկ անդրադարձ է կատարվել նաև Համաշխարհային բանկի «Արտոնյալ ֆինանսավորման գլոբալ գործիքի հիմնադրամի» շրջանակներում զարգացման գործընկերների հետ համագործակցությանը՝ ընդգծելով դրամաշնորհային ռեսուրսների հավաքագրման շարունակականության կարևորությունը՝ ինչպես ընթացիկ, այնպես էլ հաջորդող ծրագրային շրջափուլերի համար:

Ելույթներով հանդես են եկել նաև Հայաստանում ՄԱԿ մշտական համակարգող Ֆրանսուազ Ժակոբը, միջազգային կառույցների և պատասխանատու պետական գերատեսչությունների ներկայացուցիչներ: