Հայաստանի Հանրապետության Կառավարություն

Այսօր փոխվարչապետ Տիգրան Խաչատրյանը հանդիպել է ՎԶԵԲ՝ Թուրքիայի և Կովկասի հարցերով գործադիր տնօրեն Էլիզաբետտա Ֆալչետտիին: Հանդիպմանը ներկա էր նաև ՎԶԵԲ Երևանյան գրասենյակի ղեկավար Ջորջ Ախալկացին:

Հանդիպման ընթացքում զրուցակիցները քննարկել են երկկողմ համագործակցությանն առնչվող հարցերի լայն շրջանակ, այդ թվում՝ Հյուսիս-հարավ ճանապարհային միջանցքի Սիսիան-Քաջարան ճանապարհահատվածի կառուցման ընթացքի, ինչպես նաև ջրային համակարգի և կոշտ թափոնների կառավարման ուղղություններով հնարավոր համագործակցության վերաբերյալ:

Հատուկ անդրադարձ է կատարվել նաև բռնի տեղահանված անձանց բնակարանային ապահովության ծրագրի ընթացքին և վերջիններիս սոցիալ-տնտեսական ներառմանն առնչվող հարցերին: Այս համատեքստում փոխվարչապետը բարձր է գնահատել ՎԶԵԲ կողմից բռնի տեղահանվածների ձեռնարկատիրական գործունեության խթանման, ինչպես նաև վերջիններիս վերապատրաստման և որակավորման բարձրացման միջոցով զբաղվածության ապահովման ուղղությամբ իրականցվող աշխատանքները: