Հայաստանի Հանրապետության Կառավարություն

Փոխվարչապետ Տիգրան Խաչատրյանի գլխավորությամբ տեղի է ունեցել Հյուսիս-հարավ ճանապարհային միջանցքի, Մ-6, Վանաձոր-Ալավերդի-Վրաստանի սահման միջպետական ավտոմոբիլային ճանապարհի վերականգնման և բարելավման, քաղաքային կայուն զարգացման ներդրումային և հյուսիսային միջանցքի արդիականացման ծրագրերի կառավարման խորհրդի հերթական նիստը։

Նիստի ընթացքում ներկայացվել են Հյուսիս-հարավ ճանապարհային միջանցքի ներդրումային ծրագրի շրջանակում իրականացվող աշխատանքները, մասնավորապես՝ անդրադարձ է կատարվել մի շարք հարցերի, որոնք վերաբերում են Սիսիան-Քաջարան շուրջ 60կմ երկարությամբ ճանապարհի հյուսիսային հատվածի (27կմ) ներդրումային ծրագրի շինարարական աշխատանքների, ինչպես նաև հարավային հատվածի (շուրջ 24կմ) շինաշխատանքների ինժեների (տեխնիկական հսկիչի) խորհրդատվական ծառայությունների ձեռքբերման մրցութային գործընթացներին։

Օրակարգային այլ հարցերով քննարկվել են Սիսիան-Քաջարան ճանապարհի հարավային հատվածի ներդրումային ծրագրի գնումների պլանը, նույն ճանապարհահատվածի շինարարական աշխատանքների ձեռքբերման մրցութային գործընթացին առնչվող հարցեր։

Մանրամասներ են ներկայացվել նաև Քաջարանի թունելի շինարարության և թունելին մոտեցնող շուրջ 4կմ երկարությամբ ճանապարհների վերակառուցման աշխատանքների հեղինակային հսկողության ծառայությունների տեխնիկական բնութագրի վերաբերյալ:

Նիստի ավարտին փոխվարչապետ Տիգրան Խաչատրյանը քննարկված հարցերի վերաբերյալ կատարել է մի շարք դիտարկումներ և տվել համապատասխան հանձնարարականներ։