երեքշաբթի, 5 ապրիլի 2005
ՀՀ վարչապետ Անդրանիկ Մարգարյանն այսօր ընդունել է Վերակառուցման և զարգացման Եվրոպական բանկի (ՎԶԵԲ) տարածաշրջանային տնօրեն Մայքլ Դեյվիին, Հայաստանի գրասենյակի տնօրենի պաշտոնակատար Նիկոլայ Հաջիսկուն և Երևանյան գրասենյակի տնօրեն Մայքլ Վեինստեինին:
Ներկայացնելով Երևանյան գրասենյակի նորանշանակ տնօրենին, Մայքլ Դեյվին նշել է, որ նա իր աշխատանքը սկսելու է Հայաստանի կառավարության հետ արդեն իսկ ձևավորված արդյունավետ համագործակցության հիմքի վրա: Ընդգծելով, որ միայն 2004թ. համաձայնագրեր կնքվել և աշխատանքներ են իրականացվել 7 նոր ծրագրերի գծով, շուրջ 10 մլն եվրո արժողությամբ, մի քանիսը նախատեսվում է նաև այս տարվա ընթացքում, ՎԶԵԲ-ի տարածաշրջանային տնօրենը պատրաստակամություն է հայտնել ավելի լայն ծավալի ծրագրեր իրականացնել մեր երկրում: Նրա խնդրանքով, ներկայացնելով Եվրոպական բանկի հետ համագործակցության շարունակման համար առավել նախընտրելի ուղղությունները, վարչապետ Անդրանիկ Մարգարյանը նշել է, մասնավորապես, բանկային ոլորտը: Ըստ նրա, աջակցությունը բանկերի կողմից հատկապես գյուղատնտեսության բնագավառում միջնաժամկետ և երկարաժամկետ վարկերի տրամադրմանն ուղղված ծրագրերի իրականացմանը, մեծապես կնպաստի նաև տնտեսության զարգացմանը բնակչության սոցիալական խնդիրների լուծմանը, աղքատության կրճատմանը: Համաձայնելով վարչապետի հետ, Մայքլ Դեյվին հույս է հայտնել, որ առաջիկայում, ինչպես բանկային, այնպես էլ էներգետիկայի, տրանսպորտի և այլ ոլորտներում Վերակառուցման և զարգացման Եվրոպական բանկի կողմից հնարավոր կլինի շուրջ 10-12 նոր ներդրումային ծրագրեր իրականացնել Հայաստանում:
