երկուշաբթի, 7 մարտի 2005
ՀՀ վարչապետ Անդրանիկ Մարգարյանն այսօր ընդունել է պաշտոնական այցով Հայաստան ժամանած Լատվիայի Հանրապետության խորհրդարանի՝ Սաեյմայի նախագահ Ինգրիդա Ուդրեին և նրա գլխավորած պատվիրակությանը:
Կարևորելով Հայաստանի և Լատվիայի միջև հարաբերությունների հետագա զարգացումը, այդ թվում նաև համագործակցության առավել սերտացումը միջազգային կառույցներում, վարչապետը երախտագիտություն է հայտնել «Եվրոպական հարևանության» քաղաքականությունում մեր երկրի ընդգրկմանն աջակցելու Լատվիայի ջանքերի համար: Անդրանիկ Մարգարյանը հույս է հայտնել, որ ևրաինտեգրման ճանապարհն ընտրած Հայաստանը՝ ի դեմս բարեկամ և գործընկեր Լատվիայի, Եվրամիության շրջանակներում ձեռք կբերի իր նպատակների ու ձգտումների ևս մի աջակցի: Հաշվի առնելով Լատվիայի եվրաինտեգրման ուսանելի փորձը, Անդրանիկ Մարգարյանը և Ինգրիդա Ուդրեն նպատակահարմար են համարել քննարկել այդ ոլորտում փորձի փոխանակման հնարավորությունները՝ ինչպես խորհրդարանների, այնպես էլ կառավարությունների մակարդակով: Նրանք ընդգծել են այդ նպատակով իրավապայմանագրային ամուր բազայի, նպաստավոր մթնոլորտի ստեղծման անհրաժեշտությունը: Լատվիայի խորհրդարանի ղեկավարի խնդրանքով, վարչապետը ներկայացրել է մեր երկրում կառավարություն-խորհրդարան փոխհարաբերությունների ներկա վիճակն ու զարգացման հեռանկարները, կառավարության կողմից տարբեր ոլորտներում իրականացվող բարեփոխումների ընթացքը: Հանդիպման ժամանակ կողմերը նշել են նաև փորձի և տեղեկատվության փոխանակման կարևորությունը՝ մասնավորապես, պետական կառավարման համակարգի, կապի, տեղեկատվական տեխնոլոգիաների, գիտության ու մշակույթի և այլ ոլորտներում:
