չորեքշաբթի, 25 ապրիլի 2001
Այսօր ՀՀ վարչապետ Անդրանիկ Մարգարյանն այցելեց Զարգացման հայկական գործակալություն, ծանոթացավ գործակալության վարչական շենքի վերանորոգման աշխատանքների ընթացքին, առանձին բաժինների աշխատանքային պայմաններին: Այնուհետև, վարչապետը որպես ԶՀ-ի խորհրդի նախագահ, մասնակցեց գործակալության խորհրդի նիստին:
ՀԶ ՓԲԸ խորհրդի կազմում փոփոխություններ կատարելու վերաբերյալ ապրիլի 13-ի վարչապետի որոշումից հետո սա նորացված խորհրդի առաջին նիստն էր: Օրակարգում ընդգրկված էին գործակալության ընթացիկ և հեռանկարային գործունեությանը վերաբերող մի շարք հարցեր:
Վարչապետը, ընդհանուր առմամբ կարևորելով գործակալության դերը ձեռնարկատիրության և գործարարության զարգացման, Հայաստանում ներդրումների խթանման գործում, նշեց, որ առաջիկայում գործակալության աշխատանքների փորձաքարն են լինելու մայիսին Նյու-Յորքում և հուլիսին Փարիզում կայանալիք գործարար-համաժողովները՝ միջազգային հնարավոր ներդրողների, դոնոր կազմակերպությունների մասնակցությամբ: Անդրանիկ Մարգարյանը հանձնարարեց ամենայն լրջությամբ նախապատրաստվել այդ համաժողովներին առավելագույն արդյունավետություն ապահովելու համար:
Նիստում քննարկվեցին գործակալության գործունեության համար կարևոր նշանակություն ունեցող առաջիկա երկու ծրագրերի՝ «Հայաստանի ինտերնետային ուղեցույց» հիմնադրամի և «Ձեռնարկությունների աջակցման» հիմնադրամի ստեղծման հետ կապված խնդիրները: Նշվեց, որ այն գործելու է որպես էլեկտրոնային զարգացման, բարձր տեխնոլոգիաների, բիզնեսի ու ծրագրերի կենտրոն և խթանելու է արտերկրյա կապիտալի մասնակցությունը ինտերնետային տնտեսության զարգացմանը: Ծրագրի նկատմամբ որոշակի հետաքրքրություն են ցուցաբերել ՄԱԿ-ի զարգացման ծրագիրը, մի շարք այլ դոնոր կազմակերպություններ: Ընդգծելով հարցի կարևորությունը և այն, որ դա տարածաշրջանային ծրագիր է, վարչապետ Անդրանիկ Մարգարյանը կարևորեց ինֆորմացիոն տեխնոլոգիաների գծով Հայաստանի առաջատար դերի հինավորումն ու ապահովումը և հանձնարարեց միջազգային քննարկումների ժամանակ լուրջ աշխատանք տանել այդ ուղղությամբ:
«Ձեռնարկությունների աջակցման» հիմնադրամ ոչ առևտրային կազմակերպությունը առաջարկվում է ստեղծվել «Ձեռնարկությունների աջակցման հիմնադրամ» ծրագրի՝ ՀԲ-ի կողմից ֆինանսավորման ավարտման կապակցությամբ՝ հիմնադրամի գործունեությունը քաղաքացիական օրենսգրքին համապատասխանեցնելու և արտահանման խթանման ու ներդրումների ներգրավման ուղղությամբ հայկական ձեռնարկություններին տրամադրվող աջակցությունը ընդլայնելու նպատակով: ԶՀ-ի խորհրդի նիստում առաջարկվեց ստեղծել հիմնադրամի ինտերնետային էջ: Ընդհանուր առմամբ, խրախուսելով հիմնադրամի ստեղծման ծրագիրը, վարչապետը նախ կարևոր համարեց կառույցի ֆինանսական միջոցների արդյունավետ, խիստ նպատակային օգտագործումը և ապա նշեց, որ յուրաքանչյուր նոր կառույցի հետ ինտերնետային էջեր բացելու փոխարեն ավելի նպատակահարմար է դրանք համախմբել և ներկայացնել մեկ ընդհանուր տեղում, ինչը կհեշտացնի նաև դրանցից օգտվող շահագրգիռ անհատների ու կազմակերպությունների գործը:
Նիստում քննակվեցին նաև «Հայկական զարգացման գործակալություն» ՓԲԸ-ի վարչակազմակերպական կառուցվածքին, բյուջեի ձևավորման սկզբունքներին, ընկերության նկատմամբ նախորդ տարիների ընթացքում առաջացած պարտքերի մարման, գործակալության վարչական շենքի վերանորոգման աշխատանքների ավարտման համար անհրաժեշտ ֆինանսավորման և այլ հարցեր:
