հինգշաբթի, 3 մարտի 2005
ՀՀ վարչապետ Անդրանիկ Մարգարյանն այսօր ընդունել է ԱՊՀ գործադիր կոմիտեի նախագահ-գործադիր քարտուղար Վլադիմիր Ռուշայլոյին:
Պարոն Ռուշայլոն ՀՀ վարչապետին է ներկայացրել ապրիլի 29-ին Թբիլիսիում կայանալիք ԱՊՀ պետությունների կառավարությունների ղեկավարների հերթական նիստի նախապատրաստական աշխատանքների ընթացքը, նշելով, որ նիստում նախատեսված է քննարկել փոխգործակցության տարբեր ոլորտներին վերաբերող ավելի քան 3 տասնյակ որոշումների նախագծեր:
Զրույցի ընթացքում կողմերը նշել են, որ չնայած օբյեկտիվ և սուբյեկտիվ դժվարություններին, այսօր ԱՊՀ անդամ պետությունների համագործակցությունը՝ հատկապես տնտեսության, անվտանգության, հանցավորության դեմ պայքարի, հումանիտար ոլորտներում, ընդհանուր առմամբ արդյունավետ է ընթանում: Վարչապետ Անդրանիկ Մարգարյանն ընդգծել է, որ ԱՊՀ-ի ստեղծման առաջին իսկ օրերից Հայաստանը ներկայացված է եղել այդ կազմակերպության բոլոր մարմիններում, ակտիվորեն մասնակցել է դրանց աշխատանքներին: Միաժամանակ, նա նշել է, թե այնուամենայնիվ, ԱՊՀ-ի գործունեության արդյունավետության բարձրացման խնդիր կա:
Համաձայնելով Հայաստանի վարչապետի գնահատականներին, ԱՊՀ գործադիր կոմիտեի ղեկավարը նույնպես արտահայտվել է ԱՊՀ մարմինների բարեփոխումների իրականացման օգտին՝ դրանց գործունեությունն ավելի դինամիկ և արդյունավետ դարձնելու, ժամանակի պահանջներին համապատասխանեցնելու նպատակով: Հայաստանի կառավարության ղեկավարը հույս է հայտնել, որ Համագործակցության անդամ պետությունների բոլոր առաջարկությունների կառուցողական քննարկման արդյունքում կհաջողվի գտնել բարեփոխումների այն օպտիմալ տարբերակը, որը հնարավորություն կտա ԱՊՀ-ն դարձնել առավել արդյունավետ գործող կազմակերպություն: Ընդգծելով, որ տնտեսական համագործակցությունը ԱՊՀ զարգացման հիմնարար ուղղություններից է, Վլադիմիր Ռուշայլոն մտահոգություն է հայտնել, մասնավորապես, առկա գործարար ներուժի ոչ լիարժեք օգտագործման կապակցությամբ: Բացը լրացնելու նպատակով, նա նպատակահարմար է համարել ԱՊՀ երկրներում գործարար կենտրոնների ստեղծումը, որոնց օրինակներն արդեն կան ռուսաստանում, Մոլդովայում, Ուկրաինայում: ԱՊՀ գործադիր կոմիտեի նախագահը Համառուսաստանյան ցուցահանդեսային կենտրոնում Հայաստանի տաղավարը համարել է լավագույններից մեկը, նշելով, որ ցուցադրվող ապրանքատեսականիով տաղավարը տվյալ երկրի յուրօրինակ այցեքարտն է: Նա նաև ընդգծել է, որ ցուցահանդեսային կենտրոնում ավելի բարենպաստ պայմանների ստեղծման դեպքում, և հայկական, և մյուս երկրների տաղավարները զգալի հաջողություններ կարող են ունենալ:
Զրույցի ընթացքում կողմերն անդրադարձել են նաև Հայրենական մեծ պատերազմում տարած հաղթանակի 60-ամյակի տոնակատարության խնդրին: Վարչապետ Անդրանիկ Մարգարյանը տեղեկացրել է, որ այդ կապակցությամբ Հայաստանում ստեղծվել է նախապատրաստական հանձնաժողով՝ ՀՀ պաշտպանության նախարարի գլխավորությամբ և արդեն իսկ հաստատվել է նախատեսվող միջոցառումների ծրագիրը: Վարչապետը նշել է նաև, որ Հայրենական պատերազմի վետերանների Հայաստանի պատվիրակությունը կմասնակցի մայիսի 8-9-ը Մոսկվայում կայանալիք Մեծ հաղթանակի 60-ամյակի տոնակատարությանը:
Անդրանիկ Մարգարյանը և Վլադիմիր Ռուշայլոն կարևորել են մի շարք օրախնդիր հարցերի, այդ թվում՝ Համագործակցության միասնական բյուջեում ներդրվող անդամավճարների որոշման մեթոդաբանության, ԱՊՀ մարմիններում աշխատանքի վարձատրման համակարգի և այլ խնդիրների՝ կարճ ժամկետում վերջնական մշակման անհրաժեշտությունը՝ դրանք ապրիլի 29-ին ԱՊՀ անդամ պետությունների կառավարությունների ղեկավարների նիստի քննարկմանը ներկայացնելու համար:
