երկուշաբթի, 27 նոյեմբերի 2000
Այսօր տեղի ունեցավ ՀՀ կառավարության արտահերթ նիստ, որը վարում էր վարչպետ Անդրանիկ Մարգարյանը:
Քննարկման ներկայացվեց ՀՀ 2001 թվականի պետական բյուջեի մասին օրենքի նախագծի լրամշակված տարբերակը: Այն ներառում է սահմանված ժամկետում՝ նոյեմբերի 1-ին, կառավարության կողմից ՀՀ ԱԺ ներկայացված օրինագծի վրա կատարված այն փոփոխությունները, որոնք գործադիրը կատարել է նկատի առնելով այս ընթացքում միջազգային ֆինանսական կազմակերպությունների հետ բանակցությունների արդյունքները:
2001 թ. պետբյուջեի մասին օրենքի նախագծի լրամշակված տարբերակում, նախորդի համեմատ, ծախսային մասը որևէ փոփոխության չի ենթարկվել, վերագնահատելով հնարավորությունները՝ եկամուտները նվազեցվել են 10 մլրդ դրամի չափով: Այն կազմում է 195 մլրդ դրամ, ծախսերը սահմանված են 245 մլրդ դրամի չափով, բյուջեի դեֆիցիտը նվազեցվել է, հասցվելով 50 մլրդ դրամի:
Սեփականաշնորհման միջոցներից 4 մլրդ դրամ նախատեսված է կապիտալ շինարարության՝ մասնավորապես աղետի գոտու (3,5 մլրդ դրամ) և Դավիթաշենի կամրջի շինարարության (500 մլն դրամ) համար:
Նախորդ տարիներից կուտակված պարտքերի մի մասի մարումը 2001 թվականից փոխանցվել է հաջորդ տարվան:
ՀՀ կառավարությունը հաստատեց ՀՀ 2001 թ. պետական բյուջեի մասին օրենքի նախագծի լրամշակված տարբերակը և բյուջեի նախագիծը վերջնական տեսքով այսօր վերադարձրեց ՀՀ Ազգային Ժողով:
