երեքշաբթի, 7 նոյեմբերի 2000
Միջազգային «Արսենալ» կինոփառատոնի կազմկոմիտեի նախագահ, Լատվիայի Հանրապետության նախկին վարչապետ Մարիս Գայլիսի կողմից շնորհակալական հեռագիր է ստացվել ՀՀ վարչապետ Անդրանիկ Մարգարյանի անունով, որում մասնավորապես ասվում է. «Մեծարգո վարչապետ, պարոն Անդրանիկ Մարգարյան, թույլ տվեք անձամբ շնորհակալություն հայտնել «Արսենալ» կինոփառատոնին ցուցաբերած Ձեր աջակցության համար։ Հավաստիացնում եմ, որ առանց համախոհների աջակցության մենք չէինք կարող իրագործել այդ նախագծերը»։
Ռիգայում ավարտված XV միջազգային «Արսենալ» կինոփառատոնին մասնակցում էին ավելի քան 120 արտասահմանյան հյուրեր, ներկայացվել է 240 ֆիլմ, փառատոնի աշխատանքները լուսաբանել է ավելի քան150 լրագրող։ Կինոփառատոնի շրջանակներում կազմակերպվել են «Յուրիս Պոդնիեկս։ Կինոխցիկի վկայություններ» վերտառությամբ սեմինար, արվեստի թանգարան-օբյեկտ Կեյպենում, սյուրռեալիզմի լազարեթ, Սարագոսյան օթյակ, Փարաջանովի աշխատանքների ցուցահանդես, թողարկվել է «Յուրիս Պոդնիեկս-20-րդ դարը Լատվիայի կինոարտադրության աչքերով» սկավառակը, ինչը, ըստ կինոփառատոնի կազմկոմիտեի նախագահի, արդեն իսկ խոսում է կինոփառատոնի նշանակալիության մասին։
