Հայաստանի Հանրապետության Կառավարություն

Սեպտեմբերի 1-ին ՀՀ փոխվարչապետ Սուրեն Պապիկյանն այցելել է Վարդգես Պետրոսյանի անվան Երևանի թիվ 51 դպրոց։

Ողջույնի պաշտոնական միջոցառումից հետո փոխվարչապետ Սուրեն Պապիկյանն ու Երևանի քաղաքապետ Հայկ Մարությանը երեխաների օգնությամբ կտրեցին կարմիր ժապավենը` ազդարարելով հիմնանորոգումից հետո դպրոցի դռների բացումը աշակերտների առաջ։ Երևանի քաղաքապետի ուղեկցությամբ ՀՀ փոխվարչապետը շրջայց է կատարել հիմնանորոգված դպրոցում, ծանոթացել կատարված աշխատանքներին` քիմիայի և ֆիզիկայի լաբորատորիաներին ու դրանց տեխնիկական հագեցվածությանը, դասասենյակների պայմաններին, մարզադահլիճին։ Շրջայցի ընթացքում Սուրեն Պապիկյանը շնորհավորել է աշակերտներին ուսումնական տարվա մեկնարկի կապակցությամբ` ուսումնառության մեջ մաղթելով նորանոր հաջողություններ ու ձեռքբերումներ։

1940–ական թթ․ կառուցված դպրոցի շենքը վերականգնվել և ամրացվել է առաջին անգամ ՀՀ կառավարության և Ասիական զարգացման բանկի միջոցներով իրականացվող «Դպրոցների սեյսմիկ անվտանգության բարելավման» ծրագրով։ Դպրոցի երկու մասնաշենքերի վերակառուցման համար ներդրվել է 583 միլիոն դրամ։

Մինչև 9 բալ երկրաշարժի նկատմամբ դիմակայուն դպրոցը վերակառուցումից հետո իր հարկի տակ է ընդունել 1192 աշակերտների։ Բացի շենքի ամրացումից, ապահովվել է նաև հարմարավետությունը, առանձնացվել են մասնագիտացված դասասենյակներ, հենաշարժական խնդիրներ ունեցող անձանց համար ստեղծվել են անհրաժեշտ պայմաններ, դպրոցն արդեն ունի հարմարավետ մարզադահլիճ և հանդիսությունների դահլիճ։