երկուշաբթի, 6 դեկտեմբերի 2004
ՀՀ վարչապետ Անդրանիկ Մարգարյանն այսօր ընդունել է Մոսկվայում հրատարակվող «Արմյանսկի վեստնիկ» և «Գրաժդանին» ամսագրերի գլխավոր խմբագիր Կարեն Միքայելյանին:
Կարևորելով ամբողջ աշխարհում հայության տարբեր հատվածների միջև կապերի և փոխգործակցության խորացումը՝ համազգային նպատակների իրականացման, հայոց անկախ պետականության հետագա զարգացմանն աջակցելու նպատակով, Կարեն Միքայելյանը վարչապետին է ներկայացրել մոտ ապագայում Փարիզում Արևմտահայերի երրորդ համագումարի հրավիրման նախաձեռնող խմբի աշխատանքների ծրագիրը: Նա նշել է, որ նախորդ երկու համագումարները տեղի են ունեցել անցյալ դարասկզբին՝ 1917 և 1919 թվականներին՝ Երևանում (վերջինը շարունակվել է 1920թ. Փարիզում), և գալիք համագումարը, ըստ էության, նպատակ ունի շարունակելու հայրենի պետականության զորացմանն ուղղված աշխարհասփյուռ հայության համախմբման գործը:
Ողջունելով այդ գաղափարը, Անդրանիկ Մարգարյանը գնահատելի է համարել նաև Կարեն Միքայելյանի վերջին տարիների գործունեությունը՝ ինչպես խորհրդային շրջանում ՄԱԿ-ի աշխատակցի, 1994-96թթ. Հայաստանի սփյուռքահայության հետ կապերի կոմիտեի նախագահի պաշտոնակատարի, այնպես էլ ներկայումս «Արմյանսկի վեստնիկ» և «Գրաժդանին» ամսագրերի գլխավոր խմբագրի պաշտոններում աշխատելիս: Քննարկված հարցերի շրջանակում վարչապետը կարևորել է նաև Կարեն Միքայելյանի ջանքերով վերջերս Երևանում հրատարակված «Համահայկական խորհրդակցություններ (1912-1920թթ.)» ժողովածուն, որն ընդգրկում է նշված ժամանակահատվածում կայացած բոլոր համահայկական համագումարների փաստաթղթերն ու նյութերը:
