հինգշաբթի, 28 հոկտեմբերի 2004
ՀՀ վարչապետ Անդրանիկ Մարգարյանի ողջույնի խոսքը «Հայագրոֆորում» առաջին միջազգային համաժողովին
Հարգելի հյուրեր,
Տիկնայք և պարոնայք,
Հայաստանի Հանրապետության կառավարությունը կարևորում է միջազգային համագործակցության և արտաքին տնտեսական կապերի զարգացումը, համաշխարհային և տարածաշրջանային ինտեգրացիոն գործընթացներին մեր երկրի ակտիվ մասնակցությունը։
Ուստի Հայաստանում առաջին միջազգային «Հայագրոֆորումի» գումարումը, մենք դիտում ենք որպես կարևորագույն քայլ ագրարային ոլորտում միջազգային համագործակցության զարգացման ճանապարհին։
Անկախության հռչակումից հետո, մեր երկրում իրականացված տնտեսական բարեփոխումների առանցքը շուկայական տնտեսությանը բնորոշ հարաբերությունների, ինստիտուտների և կառավարման համակարգի ձևավորումն էր։ Այդ ասպարեզում մենք ունենք նկատելի ձեռքբերումներ, ինչի մասին է վկայում նաև փաստը, որ այսօր գյուղատնտեսության համախառն արտադրանքի ավելի քան 98 տոկոսը բաժին է ընկնում ընտանեկան գյուղացիական տնտեսություններին։ Տարեցտարի մենք ականատես ենք լինում ներքին սպառման շուկայում տեղական արտադրանքի պահանջարկի մեծացման, որի արդյունքում կրճատվում են այդ արտադրանքի հետ մրցակցող արտասահմանյան ապրանքների ներմուծման ծավալները, ավելին` հայկական գյուղատնտեսական արտադրանքը հաջողությամբ նորանոր շուկաներ է գտնում մեր երկրի սահմաններից դուրս:
Գյուղատնտեսության զարգացումը կառավարությունը կարևորում է երկրի պարենային անվտանգության ապահովման, գյուղի սոցիալական զարգացման, աղքատության հաղթահարման և մի շարք այլ նկատառումներով, ինչն ամրագրված է նաև կառավարության գործունեության ծրագրում: Կարևորագույն մեկ այլ` Աղքատության հաղթահարման ռազմավարական ծրագրում, առաջնահերթ է դիտվում գյուղական աղքատության հաղթահարման խնդիրը, որի ուղղությամբ արդեն իսկ գործնական քայլեր են ձեռնարկվում: Կցանկանայի առանձնացնել Միջազգային Զարգացման Ընկերակցության և IFAD-ի հետ նախապատրաստվող գյուղական վայրերում փոքր և միջին ձեռնարկատիրության զարգացման, ինչպես նաև գյուղատնտեսական ծառայությունների խթանման ծրագրերը։ Որոշակի սպասելիքներ ունենք նաև «Հազարամյակի մարտահրավերներ» Հիմնադրամի ծրագրերից։ Առհասարակ, Հայաստանը անցումային փուլի դժվարությունների հաղթահարման, տնտեսական ու սոցիալական առաջընթացի ապահովման համար բարձր է գնահատում միջազգային հանրության, Սփյուռքի աջակցությունը։
Դոնոր երկրների և միջազգային կազմակերպությունների կողմից ցուցաբերվող անգնահատելի օգնության շնորհիվ խոշորածավալ ծրագրեր են իրականացվում մասնավոր հատվածի, գյուղատնտեսության, առողջապահության, կրթության, տրանսպորտի, սոցիալական և այլ ոլորտների զարգացման համար։ Մասնավորապես, խոսքը վերաբերվում է շուկայական, արտադրական, սպասարկման ենթակառույցներին և գյուղի սոցիալական զարգացման հիմնախնդիրներին։
Անշուշտ, որոշակի ծրագրեր իրականացվում են ոռոգման համակարգերի զարգացման, սննդի վերամշակման, անասնաբուժական սպասարկման, վարկավորման, գյուղմթերքի արտահանման խթանման առումով։ Սակայն, դեռևս անելիքները շատ են։
Հարգելի բարեկամներ,
Հայաստանի Հանրապետությունը որդեգրել է ժողովրդավարության և տնտեսական բարեփոխումների իրականացման քաղաքականություն և հավատարիմ է համամարդկային արժեքների պահպանման ու համաշխարհային տնտեսությանը ինտեգրման սկզբունքներին։ Դրա լավագույն դրսևորումը մեր երկրի անդամակցումն է բազմաթիվ միջազգային կազմակերպություններին և նրանց հետ արդյունավետ համագործակցությունը։ Դրա լավագույն դրսևորումներից մեկն էլ առաջին միջազգային «Հայագրոֆորումն» է, որի մասնակիցներին հղում եմ իմ ողջույնը և մաղթում արդյունավետ աշխատանք։
