չորեքշաբթի, 25 սեպտեմբերի 2019
Փոխվարչապետ Մհեր Գրիգորյանն ընդունել է Չեխիայի դեսպանին
Փոխվարչապետ Մհեր Գրիգորյանն ընդունել է Հայաստանի Հանրապետությունում Չեխիայի Հանրապետության նորանշանակ արտակարգ և լիազոր դեսպան Բեդրիխ Կոպեցկիին:
Ողջունելով դեսպանին՝ փոխվարչապետը կարևորել է Չեխիայի հետ հարաբերությունների խորացումը՝ ընդգծելով, որ պետք է իրացնել հատկապես առևտրատնտեսական ոլորտում առկա մեծ ներուժը: Փոխվարչապետը ներկայացրել է Հայաստանի ներդրումային առավելությունները՝ վստահեցնելով, որ չեխ ներդրողները աշխատելու են բացառապես բարենպաստ բիզնես միջավայրում, որտեղ կապիտալի պաշտպանությունը գտնվում է բարձր մակարդակի վրա:
Դեսպանը, շնորհակալություն հայտնելով ընդունելության համար, համակարծիք է եղել փոխվարչապետի հետ, որ համատեղ ջանքերով անհրաժեշտ է ակտիվացնել հայ-չեխական հարաբերությունները փոխադարձ հետաքրքրություն ներկայացնող բոլոր ոլորտներում:
Զրուցակիցներն անդրադարձել են Հայաստան-Եվրամիություն հարաբերությունների բովանդակությանը, խոսել Արևելյան գործընկերության, ինչպես նաև ՀՀ-ԵՄ Համապարփակ և ընդլայնված գործընկերության համաձայնագրի շրջանակներում ընթացիկ և ապագա ծրագրերի հիմնական ուղղությունների մասին:
