ուրբաթ, 12 հուլիսի 2019
Փոխվարչապետ Մհեր Գրիգորյանը մասնակցել է Ֆրանսիայի Ազգային տոնի կապակացությամբ կազմակերպված միջոցառմանը
Փոխվարչապետ Մհեր Գրիգորյանը մասնակցել է Ֆրանսիայի Հանրապետության Ազգային տոնի կապակցությամբ Ֆրանսիայի դեսպանությունում կազմակերպված հանդիսավոր միջոցառմանը:
Փոխվարչապետը հանդես է եկել ելույթով:
***
Փոխվարչապետ Մհեր Գրիգորյանը ելույթը Ֆրանսիայի Ազգային տոնին նվիրված միջոցառմանը
Հարգելի պարոն դեսպան, դիվանագիտական կորպուսի հարգելի´ ներկայացուցիչներ, տիկնա´յք և պարոնա´յք,
Հայաստանի Հանրապետության ժողովրդի, կառավարության և անձամբ իմ անունից սրտանց շնորհավորում եմ Ֆրանսիայի բարեկամ ժողովրդին՝ Ազգային տոնի կապակցությամբ։ Գաղտնիք չէ, որ Ֆրանսիայի հանդեպ հայերը տածում են առանձնահատուկ զգացմունքներ:
Երկու դար առաջ, հուլիսի 14-ին Բաստիլի գրավումն ազդարարեց ֆրանսիական հեղափոխության սկիզբը. այն միտված էր Ֆրանսիայում ազատության, հավասարության և եղբայրության հաստատմանը, այն նաև ծնեց «Մարդու և քաղաքացու իրավունքների մասին հռչակագիրը», նախանշեց համամարդկային արժեքները և իրավունքները, որոնք այսօր դավանում են աշխարհի շատ երկրներ և հասարակություններ։ Հայաստանը ոչ միայն կիսում է այս սկզբունքներն ու արժեքները, այլև ապրում է դրանցով: «Թավշյա հեղափոխությունը» դրա անհերքելի վկայությունն է։
Անգնահատելի է բարեկամ Ֆրանսիայի իշխանությունների սկզբունքային դիրքորոշումը Հայաստանին և հայ ժողովրդին առնչվող կենսական հարցերում։ Հայաստանը մեծապես կարևորում է Ֆրանսիայի՝ իբրև ԵԱՀԿ Մինսկի խմբի համանախագահի շարունակական ջանքերն՝ ուղղված Լեռնային Ղարաբաղի հակամարտության խաղաղ կարգավորմանը։ Հայ ժողովուրդը շատ բարձր է գնահատում նաև ապրիլի 24-ը ֆրանսիական հանրապետական օրացույցում ներառելը՝ որպես Հայոց ցեղասպանության հիշատակի օր: Այս կապակցությամբ ցանկանում եմ ևս մեկ անգամ հայտնել հայ ժողովրդի խորին շնորհակալությունը:
Վստահ եմ, որ մեր բարեկամության դարավոր ավանդույթների վրա հիմնված հայ-ֆրանսիական ջերմ հարաբերությունները կշարունակեն զարգանալ ու խորանալ։
Եվս մեկ անգամ շնորհավորում եմ Ձեզ, պարո՛ն դեսպան, Ֆրանսիայի դեսպանության ողջ անձնակազմին, ինչպես նաև՝ Հայաստանում և ողջ աշխարհում գտնվող բոլոր ֆրանսիացիներին Ֆրանսիայի ազգային տոնի կապակցությամբ։
Կեցցե՛ հայ-ֆրանսիական բարեկամությունը։ Կեցցե՛ Ֆրանսիան, Կեցցե՛ Հայաստանը:
