ուրբաթ, 17 մայիսի 2019
Կառավարությունում տեղի է ունեցել Կայուն զարգացման նպատակների ազգային նորարարական կենտրոնի կառավարման խորհրդի նիստը
Մայիսի 17-ին Կառավարությունում տեղի է ունեցել Կայուն զարգացման նպատակների ազգային նորարարական կենտրոնի կառավարման խորհրդի նիստը՝ կառավարման խորհրդի համանախագահներ` ՀՀ փոխվարչապետ Տիգրան Ավինյանի և Հայաստանում ՄԱԿ-ի մշտական համակարգող Շոմբի Շարփի գլխավորությամբ:
Իր բացման խոսքում Տիգրան Ավինյանը շնորհակալություն է հայտնել ՄԱԿ-ի հայաստանյան թիմին, ինչպես նաև հիմնական դոնորներ ՌԴ և Շվեդիայի կառավարություններին ու շեշտել, որ ՀՀ կառավարության հռչակած ներառական տնտեսական զարգացման տեսլականը համահունչ է ՄԱԿ կայուն զարգացման նպատակներին, հետևաբար, Կենտրոնի գործունեության հաջող արդյունքները կարող են էապես նպաստել կառավարության առջև ծառացած մի շարք խնդիրների արդյունավետ լուծմանը:
ՄԱԿ-ի մշտական համակարգող Շոմբի Շարփը շեշտել է, որ ՄԱԿ-ը մեծապես կարևորում է նորարական կենտրոնների գործունեությունը որպես գործուն միջոց աշխարհում կայուն զարգացման նպատակներին հասնելու ճանապարհին:
ՄԱԶԾ մշտական ներկայացուցիչ Դմիտրի Մարիյասինը բարձր է գնահատել Կենտրոնի գործունեությանը ՀՀ կառավարության կողմից ցուցաբերվող աջակցությունը` ընդգծելով ՄԱԿ կայուն զարգացման նպատակների իրականացման համար Կենտրոնի իրականացրած ծրագրերի կարևորությունը:
«FAST» հիմնադրամի համահիմնադիր Ռուբեն Վարդանյանն անդրադարձել է կենտրոնի կառավարման խորհրդի լիազորություններին, նորարարության և փորձարկումների կարևորությանը, ինչպես նաև կենտրոնի գործունեության արդյունավետության գնահատման հետ կապված հարցերին:
Նիստի ընթացքում Կայուն զարգացման նպատակների ազգային նորարարական կենտրոնի տնօրեն Ստեփան Մարգարյանը ներկայացրել է 2018թ. նոյեմբերից մինչև 2019թ. փետրվարն ընկած ժամանակահատվածում կատարված աշխատանքները՝ հանրային կառավարման ոլորտի, կանխարգելիչ բժշկության, զբոսաշրջության, հարկային հավաքագրման արդյունավետության բարձրացման և այլ ուղղություններով իրականացված ծրագրերը: Անդրադառնալով առաջիկա անելիքներին՝ նա, մասնավորապես, հիշատակել է հանրային ծառայությունների թվայնացման և աշխատաշուկայի կարիքների ներկայացման ուղղությունները:
Նիստի ընթացքում քննարկվել են Կենտրոնի գործունեության համակարգման արդյունավետության բարձրացման հետ կապված հարցեր: Կարևորվել է այնպիսի մեխանիզմների ներմուծումը, որոնք թույլ կտան ապահովել տարբեր ոլորտներում պետական քաղաքականության մշակման համար Կենտրոնի իրականացրած հետազոտությունների գործնական կիրառելիությունը:
Խորհրդի անդամների կողմից ուրվագծվել են 2019թ. մայիս-դեկտեմբեր ժամանակահատվածի համար գերակա ուղղությունները: Անդրադարձ է կատարվել Կենտրոնի և մասնավոր հատվածի ու գիտական հաստատությունների միջև կապերի խորացման ուղիներին:
