ուրբաթ, 3 սեպտեմբերի 2004
ՀՀ վարչապետ Անդրանիկ Մարգարյանն այսօր ընդունել է ՄԱԿ-ի Պարենի և գյուղատնտեսության կազմակերպության գլխավոր տնօրեն Ժակ Դյուֆին և նրա գլխավորած պատվիրակությանը: Վարչապետը անչափ կարևորել և բարձր է գնահատել Պարենի և գյուղատնտեսության կազմակերպության գործունեությունը մեր երկրում, որին Հայաստանն անդամակցում է 1993 թվականից: Ըստ Անդրանիկ Մարգարյանի, անդամակցությունը հնարավորություն է ընձեռել մշակել և գործնականորեն իրականացնել Հայաստանի տնտեսության ագրարային հատվածի զարգացմանը նպաստող մի շարք առաջնահերթ և հրատապ ծրագրեր: Վարչապետը նշել է նաև, որ կազմակերպության հետ փոխգործակցության ակտիվացմանը նպաստել է Հայաստանում կազմակերպության ներկայացուցչության ստեղծումը ևս:
Կառավարության ղեկավարը ՄԱԿ-ի Պարենի և գյուղատնտեսության կազմակերպության ծրագրերի իրագործումը կարևոր է համարել նաև մեր երկրում աղքատության հաղթահարմանն ուղղված ռազմավարական ծրագրով նախատեսված խնդիրների լուծման առումով: Առաջիկա համագործակցության ծրագրերի շարքում վարչապետը նշել է հացահատիկային մշակաբույսերի սերմնաբուծության զարգացման և անտառվերականգնման նպատակով տնկարանային տնտեսությունների ստեղծման ծրագրերը:
Անդրանիկ Մարգարյանը նաև շնորհակալություն է հայտնել պարոն Դյուֆին՝ իր գլխավորած կազմակերպության կողմից «Հայագրոֆորում» առաջին միջազգային համաժողովի և «ԱրմպրոդԷքսպո-2004» գյուղատնտեսական և պարենային ապրանքների միջազգային ցուցահանդեսի կազմակերպման ու ֆինանսավորման ուղղությամբ իրականացվող աշխատանքների համար, որոնք տեղի կունենան ս.թ. հոկտեմբերի 28-30-ը , Երևանում:
ՄԱԿ-ի Պարենի և գյուղատնտեսության կազմակերպության գլխավոր տնօրեն Ժակ Դյուֆը ևս գոհունակությամբ է նշել Հայաստանի հետ համագործակցությունը, վարչապետին ներկայացնելով ՀՀ գյուղնախարարությունում իր ունեցած արդյունավետ հանդիպման և քննարկված հարցերի մանրամասները, որոնք ըստ նրա շատ կարևոր են Հայաստանի համար: Դրանցից մի քանիսը, պարոն Դյուֆի հավաստմամբ, նաև տարածաշրջանային կարևորության ծրագրեր են: Պարենի և գյուղատնտեսության կազմակերպությունը, ըստ տնօրենի, իր գործունեությունը տեսնում է ոչ միայն Հայաստանի գյուղատնտեսությանը պատուհասած աղետների, արտակարգ իրավիճակների հետևանքների մեղմմանն ուղղված խնդիրների լուծման, այլ զարգացման ծրագրերի իրագործման մեջ, որոնք կօգնեն և գյուղացիությանը, և կնպաստեն որակյալ գյուղմթերքի արտահանման ծավալների մեծացմանը:
Հանդիպման ավարտին երկուստեք վերահաստատվել է համագործակցության պատրաստակամությունն ու ՄԱԿ-ի Պարենի և գյուղատնտեսության կազմակերպության գործունեության առավել ակտիվացման անհրաժեշտությունը:
