երեքշաբթի, 10 օգոստոսի 2004
ՀՀ վարչապետ Անդրանիկ Մարգարյանն այսօր հրավիրել է խորհրդակցություն, որին մասնակցել են շահագրգիռ նախարարությունների և գերատեսչությունների ղեկավարներն ու հանրապետության մարզպետները: Քննարկվել է «ՀՀ 2004թ. պետական բյուջեի մասին» ՀՀ օրենքում փոփոխություններ և լրացումներ կատարելու մասին» ՀՀ օրենքի կիրարկման վերաբերյալ վարչապետի մոտ 2004թ. հունիսի 16-ին կայացած խորհրդակցության արդյունքում տրված հանձնարարականների կատարման ընթացքը:
Նախորդ խորհրդակցության ժամանակ վարչապետը նշել էր, որ «ՀՀ 2004թ. պետական բյուջեի մասին» ՀՀ օրենքում կառավարության առաջարկած փոփոխությունների և լրացումների հիման վրա հաստատված շուրջ 12 մլրդ դրամի հաշվին նախատեսված ծրագրերի իրականացումը լինելու է իր մշտական ուշադրության կենտրոնում և կարևորել էր հատկապես տեղերում աշխատանքների արագ և որակով իրականացումը: Այսօր կատարված աշխատանքների վերաբերյալ նախ հաշվետվություններ են ներկայացրել գյուղատնտեսության, տրանսպորտի և կապի նախարարները, ՀՀ կառավարությանն առընթեր ջրային պետական կոմիտեի նախագահը: Ընդհանուր առմամբ բավարար գնահատելով ներկայացված արդյունքները, վարչապետը նաև հանձնարարականներ է տվել հատկապես ճանապարհաշինության և ասֆալտապատման որոշակի աշխատանքների արագացման և որակի բարելավման վերաբերյալ: Այնուհետև քաղաքաշինության նախարարը, Երևանի փոխքաղաքապետը և հանրապետության մարզպետները ներկայացրել են նշված 12 մլրդ դրամի հաշվին տրամադրված գումարների իրացման ընթացքը՝ մասնավորապես, կրթական օբյեկտների շինարարության և հիմնանորոգման աշխատանքների կատարման ուղղությամբ: Հաշվետվություններից պարզվել է, որ մրցույթների կայացման և պայմանագրերի կնքման աշխատանքները հիմնականում բավարար տեմպերով են իրականացնում ՀՀ քաղաքաշինության նախարարությունը՝ մարզերում և Երևանում, Արմավիրի, Արարատի, Լոռու, Կոտայքի, Շիրակի, Վայոց Ձորի և Տավուշի մարզպետարանները: Արմավիրի, Շիրակի և Վայոց Ձորի մարզպետները զեկուցել են, որ իրենց մարզերում դպրոցների շինարարության և հիմնանորոգման աշխատանքների մեծ մասն արդեն իսկ սկսվել է: Դպրոցական որոշ շենքերի վերանորոգման համար հայտարարվել է կրկնակի մրցույթ, իսկ Շիրակի մարզում նպատակահարմար չհամարելով Վարդաքար գյուղի դպրոցի հիմնանորոգումը, առաջարկվել է նոր դպրոցի կառուցում 2005թ-ին: Կրթական օբյեկտների շինարարության և հիմնանորոգման համար նախատեսված մրցույթներ չեն հասցրել անցկացնել Երևանի քաղաքապետարանը, Սյունիքի, Գեղարքունիքի և Արագածոտնի մարզպետարանները, որտեղ աշխատանքները դեռևս գտնվում են նախագծա-նախահաշվային փաստաթղթերի ավարտման փուլում: Հաշվետու շրջանում վարչապետը նրանց աշխատանքը անբավարար է գնահատել:
Խորհրդակցության արդյունքում վարչապետ Անդրանիկ Մարգարյանը նախարարությունների և գերատեսչությունների ղեկավարներին, մարզպետներին հանձնարարել է ավելի մեծ ուշադրություն հատկացնել մրցույթների անցկացման համար փաստաթղթային ձևակերպումների գործընթացի բարելավմանը, աշխատանքների արագացված ռեժիմով, սակայն բարձր որակով կատարմանը՝ կրթական օբյեկտները նախատեսված ժամկետներում շահագործման հանձնելու համար: Վարչապետը մեկ անգամ ևս նշել է, որ մինչև տարեվերջ պարբերաբար նման խորհրդակցություններ են հրավիրվելու՝ արդեն կատարված աշխատանքներին և հաջորդ փուլի խնդիրներին անդրադառնալու նպատակով: