չորեքշաբթի, 21 հուլիսի 2004
ՀՀ վարչապետ Անդրանիկ Մարգարյանն այսօր ընդունել է Հայաստանում ԱՄՆ արտակարգ և լիազոր դեսպան Ջոն Օրդուեյին, որն ավարտում է դիվանագիտական առաքելությունը մեր երկրում:
«Երեք տարի առաջ մեր առաջին հանդիպումից հետո ինձ համար միանշանակ էր, որ մեզ շատ լավ համագործակցություն է սպասվում: Այսօր արդեն դա փաստ է»,-վարչապետի հետ իր հրաժեշտի հանդիպմանը նշել է ԱՄՆ դեսպանը: Նա շնորհակալություն է հայտնել Հայաստանի կառավարությանը և անձամբ վարչապետ Անդրանիկ Մարգարյանին՝ այդ տարիների ընթացքում համատեղ արդյունավետ աշխատանքի համար:
Վարչապետը ևս բարձր է գնահատել դեսպան Ջոն Օրդուեյի գործունեությունը մեր երկրում, հայ-ամերիկյան հարաբերությունների խթանմանն ուղղված նրա ջանքերը, նշելով, որ նկատելի տեղաշարժեր կան ինչպես քաղաքական, տնտեսական կապերի ակտիվացման, այնպես էլ միջազգային կազմակերպություններում համագործակցության ասպարեզում: Որպես համագործակցության արդյունքներից մեկը, վարչապետը նշել է Հայաստանի ընդգրկումը ամերիկյան կառավարության «Հազարամյակի մարտահրավեր» նախաձեռնության մեջ: Ներկայացնելով նախաձեռնության հայաստանյան ծրագրի մշակման, քննարկումների ընթացքը, վարչապետը հավաստել է, որ նախանշված ժամանակացույցի համաձայն սեպտեմբերին՝ բոլոր առաջարկությունները կամփոփվեն, ծրագիրը Հայաստանում կհաստատվի և կներկայացվի ԱՄՆ կառավարությանը: Անդրանիկ Մարգարյանը հույս է հայտնել, որ հայաստանյան ծրագիրը կարժանանա ամերիկյան կառավարության ուշադրությանը, դրական արձագանքին, իսկ դրա իրագործումը զգալիորեն կնպաստի սոցիալական ուղղվածություն ունեցող Աղքատության հաղթահարման ռազմավարական ծրագրի կատարմանը:
Համաձայնելով վարչապետի հետ, դեսպան Ջոն Օրդուեյը նշել է, որ ինքը ևս «Հազարամյակի մարտահրավերի» հայաստանյան ծրագրի մշակումը համարում է երկու երկրների համագործակցության ու Հայաստանի համար չափազանց կարևոր նախաձեռնություններից մեկը և հույս է հայտնել, որ արդեն նոր դեսպանի օրոք այն հաջողությամբ կիրականանա:
Հանդիպման ավարտին վարչապետ Անդրանիկ Մարգարյանը հաջողություններ է մաղթել դեսպան Ջոն Օրդուեյին՝ նրա հետագա դիվանագիտական աշխատանքում:
